Na Aruba Racquet tabata tin e conferencia di prensa pa anuncia cu dialuna a cuminsa e di 34th International Tournament Tihta Championships. Despues di 4 aña e deportistanan di tennis ta contento cu Tihta Championships tey atrobe. Riba e mainta aki Franz Sydow ta bisa “ta sumamente importante pa por participa y tin e hubentud compitiendo internacionalmente, un biha mas”. E Tihta Championships a cuminsa riba dialuna y ta finalisa diabierna, esaki ta un evento hopi grandi unda a yega di tuma lugar caba na; Eagle Tennis Club, Holiday Inn, y awo lo tuma luga na Aruba Raquet Club.
Tai Foo representante di Aruba Racquet Club y Subway, ta invita tur hende pa wak e weganan cu ta bay tin na Aruba Racquet Club. E evento ta uno internacional unda ta participa Japan, Hong Kong, Mexico, Republica Dominicana, Venezuela, Colombia, y Aruba. Cada un di e participante a bin cu nan famia y coash, esaki ta nifica un impacto riba economia y turismo di Aruba, segun Tai Foo. E meta ta pa deporte sigui crece y cu nan por sigui apoya tur deporte, pero awo specialmente ta apoya tennis y ta invita pueblo di Aruba pa apoya e deportistanan riba e siman aki na Aruba Racquet Club di 8 am te cu 6 pm.
Gian miembro di tennis Aruba a bisa, cu nan ta hopi orguyoso di por ta parti di un evento asina grandi ya cu ta un evento cu e muchanan ta prepara full e aña pa participa y pa nan wak den cua nivel nan ta bay, pa por prepara pa competi. Tambe a remarca cu lo spera di conta cu e apoyo di tur nan sponsor pa por sigui organisa e evento aki, e siguiente añanan.
