Riba 18 di december 2024, Corte a condena cuater periodista pa violacion – hunto cu un agente policial – di e secrecia oficial di e agente policial aki. Ademas, tres di nan a ser condena pa soborno. A absolve e cuater periodista di participacion den un organisacion criminal.
Corte a determina cu durante un periodo di mas cu dos aña, e periodistanan aki tawata tin acceso na e trafico di portofon di Cuerpo Policial di Aruba. Nan a haci e acceso aki posibel hunto cu e agente policial menciona, pa medio di un coneccion digital cu nan a crea entre un portofon y e laptop di e periodistanan individual. Debi na e hecho cu hunto cu e agente policial nan a haci e acceso na e trafico di portofon posibel, mescos cu e agente policial aki nan a viola secrecia oficial.
Corte a determina cu den e mesun periodo, tres di e periodistanan a duna regalonan y a haci promesanan na e agente policial, pues cu di e manera aki nan a sobornele.
E informacion policial cu ta distribui pa medio di portofon ta informacion confidencial, cu no ta destina na oyentenan no autorisa. Si e informacion aki yega na personanan robes na e momento robes, ta viola e privacidad di ciudadanonan y esaki por conduci na situacionnan peligroso of no desea. Pa e motibo aki, e informacion aki ta confidencial y disponibel solamente pa agentenan policial.
E abogado di e sospechosonan a argumenta cu periodistanan tin libertad di recopila noticia, y cu esaki ta inclui e informacion cu e sospechosonan a haya pa medio di e portofon. Corte ta di acuerdo cu e argumento di abogado cu periodistanan tin libertad di recopila noticia. Esaki ta un derecho importante cu mester protege y respeta. Sin embargo, e no ta un derecho sin limite. E ta ser limita pa derecho penal y pa normanan di cuido debido. Esaki ta significa cu periodistanan no mag di comete hechonan castigabel pa obtene informacion, y esaki ta precisamente loke a bay robes den e caso aki; e sospechosonan a comete hechonan castigabel pa haya acceso na e informacion confidencial.
Corte a impone diferente castigo, pa motibo cu a tene cuenta cu e circunstancianan personal y e rol di e diferente sospechoso. Un di e sospechosonan a ser impone un castigo di prizon di diesocho luna, diesdos di nan condicional. El a ser condena previamente pa un hecho similar. Dos di e sospechosonan a haya un castigo di trabao pa comunidad di 240 ora y un castigo di prizon condicional di diesdos luna. E di cuater sospechoso ser condena na un castigo di trabao pa comunidad di 150 ora y un castigo di prizon condicional di tres luna.
A absolve tur sospechoso di participacion den un organisacion criminal, pasobra Corte ta haya cu no tin suficiente prueba cu nan a comete e acto ey.
- Latest
