Skirbi pa Clyde Harms
Pa habri e anochi di e concierto clausural, Aruba Symphony Festival a sorprende e publico grandi presente cu un presentacion emotivo di nos himno nacional canta pa e coro Ars Nova, dirigi pa Sra. Mayra Kock-Garrido, y acompaña pa e Aruba Symphony Orchestra di casi setenta studiante, bou direccion di Simon Gollo. Un amigo a comenta despues cu aki ya el a haya balor di entrada cu el a paga. E areglo tabata di e musico Arubiano hopi conoci Franklin Granadillo.
E presentacion principal di e anochi tabata di e violinista Hapones Kazuhiro Takagi kende a toca completamente di memoria e Concierto di Violin den E Menor Op.64 di Mendelssohn. E maestro Takagi a demonstra pakico e ta concertmeester di cuatro orkesta na tres continente. E aplauso fuerte cu e publico a dun’e a inspir’e pa regala nan un reprise di un obra no hopi conoci pero cu tabata rekiri un nivel halto di habilidad como violinista.
E ultimo piesa riba e programa tabata otro obra di Mendelssohn, Symphony No. 4 den A Mayor, Op. 90 cu e orkesta a interpreta magistralmente. Simon Gollo a exprimi tur loke e tabata por di e musiconan studiante y nan a responde magistralmente. Na final tur hende tabata contentisimo cu e resultado.
Pero Aruba Symphony Festival tabatin un otro sorpresa placentero. Den presencia di nos icono musical Padú del Caribe, Aruba Symphony Orchestra a toca, y e coro Ars Nova a canta, Padú su walz tan stima, “Abo So”. Pa e interpretacion di e piesa aki, Simon a pasa e batuta di director pa e popular musico Venezolano Jesús David Medina kende a haci e areglo. Varios persona no por a resisti y a canta hunto cu e coro.
Tabata un placer pa mira nos Minister di Cultura, Sra. Xiomara Ruiz-Maduro y nos Gobernador Interino Sra. Yvonne Laclé-Dirksz, dos persona cu a mustra un enorme entusiasmo pa e Festival, subi e escenario pa felicita e musiconan y combersa cu miembronan di e directiva di Aruba Symphony Festival. Pa e musiconan tabata un experiencia inolvidabel. Solamente na Aruba!
Aruba Symphony Festival 2018 ya ta historia. Segun tur hende cu a asisti na e conciertonan, e tabata e miho. Sigur ta cu el a atrae mas hende cu nunca y e publico a responde generosamente cu su donacionnan. Esaki ta importantisimo pasobra manera tur cos bon, presentacion di un festival di e calidad di Aruba Symphony Festival ta costoso. Si Aruba kier sigi como cede di e Festival nos tur mester apoy’e fuertemente.
Den e proximo dianan lo mi publica un serie pictorial recordando Aruba Symphony Festival 2018. Keda pendiente! [email protected]