A celebra 60 aña di Jacintha Kleuterschool

Jacintha Kleuterschool ta di fiesta. Awe nan a celebra nan 60 aña di existencia pa cual e scol complete a asisti na un servicio religioso pa gradici Tata pa e guia den 60 aña.

Riba e dia aki tambe tabatin un cambio a tuma luga na e scol. A dicidi di cambia di nomber y awo el a bira Scol Preparatorio San Jacintha, debi cu el a wordo declara Beato caba.

Na e celebracion di awe tabata presente e.o. prome minister mr. Evelyn Wever Croes, kende a gradici tur e maestronan cu a educa e muchanan durante nan 60 aña di existencia den e bario di Dakota. Analisando e situacion, e mandatario a bisa cu awo ta tempo pa enseñansa drenta fase di trankilidad y ampliacion di scolnan, pasobra e poblacion a crece. E ta haya cu e klasnan mester aumenta pa cada klas por tin menos studiante, di e forma aki dunando e muchanan miho atencion.

Anuesca Baly, directora di SKOA, a recorda cu ta miles y miles di muchanan di Dakota a cuminsa cu nan educacion na Jacintha Kleuterschool. Esaki ta un di e scolnan di SKOA cu ta cumpli 60 aña, ya cu esun di mas bieu tin 110 aña bieu. Scolnan catolico semper tabata un pilar den tur bario, manera ta e caso di Jacintha Kleuterschool, treciendo e fe mas cerca di nos studiantenan.

E ta comparti pensamento di prome minister, pa ekipa e maestronan pa crea miho ciudadanonan den nos comunidad. Y pa logra esaki, e klasnan mester ta mas chikito. “Pabien na habitantenan di Dakota, cu ta un bario pega cu otro y orguyoso.”

Comments

comments