Un semi-submarino cu varios ton di droga a wordo captura den e limite maritimo di Colombia y Ecuador, den ocean Pacifico.
Segun e Armada di Ecuador a informa, e embarcacion a wordo detecta ora cu e miembronan di e institucion aki, como tambe su coleganan di Colombia, a atende un emergencia cu a presenta den e “Limite Politico Internacional” cu un barco di pesca y su tripulacion.
“N’e intento di evadi e Forsanan Arma di Ecuador y Colombia, e semi-submarino tabata pasa continuamente e limite politico internacional di ambos nacion, siendo captura finalmente den teritorio Colombiano p’e Armada di e pais aki,” a indica desde Quito.
Fuera di e substancianan ilegal, den e semi-submarino tabata transporta cuater persona di nacionalidad Colombiano, cu a wordo poni na ordo di e autoridadnan competente di nan pais.
Otro confiscacion den 2024
Dia 20 di januari ultimo, e Armada di Ecuador a duna di conoce e confiscacion di otro semi-submarino 32 miya nautico di e costa di e provincia di Esmeraldas, noordwest di e pais; accion ta cu tambe a tuma luga den coordinacion cu e Armada di Colombia.
Den e embarcacion a haya aproximadamente 3,2 ton di droga, specificamente cocaina, balora na casi 50 miyon dollar. Fuera di esey, a detene tres persona.
Algun dia despues, e Armada di Colombia a confisca otro nave ilegal di e tipo aki cu tabata transporta 795 kilogram di clorhidrato di cocaina, na momento cu nan tabata transita den e awanan di Pacifico centro Colombiano.
Aparentemente, e submarino, cu tabata tripula pa tres persona, tabata dirigi pa Centroamerica, segun e institucion a indica. “Cu e confiscacion aki, a evita e entrada di cerca di 27 miyon dollar n’e organisacionnan di narcotraficante, producto di nan benta riba mercado ilegal internacional, como tambe e distribucion di aproximadamente dos miyon di dosis riba caya na mundo,’ e Armada a señala.
