Cesar Antonio Lopez-Larios, alias ‘El Greñas’, lider di alto rango di e organisacion criminal Mara Salvatrucha (MS-13) na El Salvador, a wordo aresta na Houston, Texas (Merca), Ministerio Publico di e Districto Oost di New York a comunica, estado na cual el a wordo traslada bao custodia hunto otro 13 integrante di MS-13, unda cu nan lo wordo huzga pa acusacion vincula na terorismo.
“E aresto di Lopez-Larios, un di e lidernan mas importante di MS-13 na mundo, ta un logro significativo p’e forsanan di orden y otro paso crucial den e desmantelamento di e organisacion criminal internacional aki,” fiscal Breon Peace a comenta. “E acusado pronto lo enfrenta un huicio den corte federal na Long Island caminda cu, siguiendo su ordennan, MS-13 a drama hopi sanger y a converti e comunidadnan den zona di guera,” el a agrega.
Fundado di Los Doce Apostoles del Diablo
‘El Greñas’ tabata lider di MS-13 durante aproximadamente dos decada. E tabata miembro fundado di Los Doce Apostoles del Diablo, structura di mando y control cu despues a wordo denomina como Ranfia Nacional.
E aresto a tuma luga dia 9 di juni 2024 den man di FBI ora cu nan a yega n’e aeropuerto Intercontinental George Bush na Houston, Texas. E criminal tabata profugo desde mas di tres aña.
Ta acusa e delincuente di conspiracion pa proporciona y sconde sosten material na terorista, conspiracion pa comete acto di terorismo cu ta pasa e fronteranan nacional, conspiracion pa financia terorismo y conspiracion pa narcoterorismo.
Un structura internacioal
Den e comunicado ta indica cu Ranfla Nacional a dirigi e expansion di e actividadnan di MS-13 rond mundo, incluyendo Merca y Mexico. Tambe a plantia cu Lopez-Larios y e otro lidernan di e gang a wordo manda pa organisa operacion, haci conexion pa obtene narcotico y arma di candela di e cartelnan di droga Mexicano manera Zetas, Cartel del Golfo, Cartel de Jalisco Nueva Generacion (CJNG) y Cartel de Sinaloa y dedica na trata y e contrabana di persona.
Ivan J. Arvelo, agente special encarga, a subraya cu e aresto aki ta “representa otro lider importante di MS-13 cu lo wordo hiba dilanti husticia e aña aki. A pesar di su intentonan di evadi autoridad, Lopez-Larios awo mester responde n’e acusacionnan penal deriva di su supuesto maneho di un di e organisacionnan criminal transnacional mas malicioso cu ta existi den actualidad.”
Ranfla Nacional tambe a ordo un cantidad di miembro di MS-13 na Merca pa nan involucra den actividad criminal, manera trafico di droga y extorsion pa recauda placa pa sostene nan actividadnan terorista na El Salvador y otro luga. Di igual manera, a ordena pa comete acto di violencia pa promove nan obhetivo y implementa regla cu ta permiti MS-13 consolida den parti di e pais Norteamericano, incluyendo e Districto Oost di New York.
“Awo cu sr. Lopez-Larios ta tra’i tralie, ya e no ta den e supuesto posicion di poder dirigiendo un reinado di teror, ni enrikeciendo MS-13 y su socionan di e cartel,” subdirector interino encarga di FBI, Krysti Hawkins a afirma di su parti.