E diputadonan di e Asamblea Nacional di Madagascar a aproba siman pasa un proyecto di ley presenta p’e gobierno cu ta modifica e articulonan di Codigo Penal pa endurece e sancionnan penal contra e violadonan di menor di dad, segun e medionan local. E modificacionnan introduci ta premira castracion kimico of cirugia p’e autornan di e tipo di delitonan aki di agresion sexual.
Redefini e concepto di violacion
Segun Le Quotidien, e codigo anterior tabata premira entre cinco y binti aña di trabao forsa p’e autornan di violacion. Awo, e legisladonan a señala den un comunicado cu e “ley” nobo “ta redefini e concepto di violacion y ta organisa pena den funcion di e edad di e victimanan, mientras tanto ta busca pa neutralisa e depredadornan sexual mediante e introduccion di castracion kirurgico of kimico.”
Cu e actual reforma, e Codigo Penal ta establece cadena perpetuo y castracion kirurgico p’e individuonan declara culpabel di viola un menor di 10 aña. Si e victima tin entre 10 y 13 aña, e acusado mester somete na un castracion kimico, fuera di un pena di 15 y 20 aña di trabao forsa. E pena aki lo tin di entre 10 y 20 aña si e victima tin entre 13 y 18 aña. En cambio, si e criminal ta menor di dad, no lo aplica e castracion.
AFP ta informa cu e medida, aproba diaranson ultimo p’e Camara Alta di e Senado, ainda mester wordo valida p’e Corte Supremo Constitucional prome cu e presidente di e pais, Andry Rajoelina, por promulga y convertie den ley.
Daño grave y ireversibel
E medidanan aki a wordo considera como radical pa algun defensor di derecho humano. Director regional di Amnesty International, Tigere Chagutah, a comenta cu e castracion legal ta “incompatibel cu e disposicionnan constitucional contra tortura y otro mal trato, como tambe e normanan regional y internacional di derecho humano.”
E consehero di Amnesty International na Madagascar, Nciko wa Nciko, a critica e ley pa no “enfoca riba e victimanan” y a reflexiona riba cu “e castracion ta causa daño grave y ireversibel.” “Nos por tin caso caminda cu un individuo ta wordo declara culpabel y e tribunalnan ta hala atras den e veredicto y limpia su nomber,” el a añadi.
Di su parti, Jessica Lolonirina Nivoseheno, di e movemento Hende Muhe Kibrando e Silencio, a argumenta cu castracion por ta un “disuasivo” p’e “cultura di violacion’ riba e isla, caminda hopi caso “ta resolve amistosamente dentro di e famia.”
Tambe, e minister di Husticia, Landy Mbolatiana Randriamanantenasoa, a defende e disposicionnan legal aki n’e criticanan internacional encuanto e derechonan humano. Den e sentido aki, el a subraya cu Madagascar “ta un pais soberano cu tin tur derecho na modifica su leynan.” E funcionario a afirma cu aña pasa a registra 600 violacion di menor. “N’e resurgimento di e violacionnan, nos mester a actua,” el a añadi.
Por ultimo, Randriamanantenasoa a agrega cu lo revela publicamente e identidad di e sospechosonan declara culpabel. “E sociedad mester sa kico nan a haci” y kende nan ta,” el a señala.
