Windybeth Bonny Guaidó, un hoben influencer y cantante Venezolano, cu ta bisa ta prima di e dirigente opositor Juan Guaido, ta un di e tres acusadonan p’e asesinato di un pareha y nan yiu muhe di 22 aña n’e localidad Chiloeches, Spaña, dia 13 di april.
Varios medio Spaño a publica diaranson e parentesco cu Guaido di e muhe di 30 aña do edad, deteni hunto cu dos homber p’e tripel crimen aunke despues a keda den libertad provisional cu medida cautelar.
E fuentenan cercano n’e opositor Venezolano a sigura na EFE cu a haya sa di dje, manera otro, despues cu e tabata presidente interino y cu nunca a conoce su mayornan di e muhe, ni familiarmente a scucha papia di nan, sino cu e tabata esun cu tabata bisa cu ambos tabata primol
Segun e mesun fuentenan, Guaido a sigura cu di resulta culpabel di participa den e tripel asesinato, e ta spera pa tin husticia y aplica tur e peso di ley.
Kende ta Wyndybeth Bonny Guaido?
Windybeth Bonny Guaido ta wordo identifica como influencer y cantante. El a biba na Colombia, caminda cu na 2019 diferente medio local a entrevist’e pa su carera y su supuesto parentesco cu e dirigente politico Venezolano, cu p’e momento ey a declara como presidente interino di e pais. E tin varios videoclip graba y publica riba YouTube.
Na 2019 e tabata manifesta contra Nicolas Maduro: “Ya ta suficiente tanto bala y tanto tiro. Awo ta ora di paga. Mester ta mas consciente. Nos ta cerca di logra e libertad y mi tabata participe n’esey,” el a bisa, ora el a sigura di ta prima di Guaido.
Riba su rednan social e ta pose cu hopi poco paña, haciendo ehercicio of cantando. Ningun hende lo bisa di ta trata di un potencial asesino. Sinembargo, e hoben a confesa cu el a drenta den e chalet di e victimanan y entre nan tres a mata tur.
Con e crimen a sosode?
Di acuerdo cu e medio El Debate, e Venezolano tabata pareha di un hoben di 23 aña di edad, identifica como Fernando P.F. Nan dos, hunto cu un otro homber di 25 aña di edad, David M.A., kende ta primo di e ex-pareha di e hoben asesina, a planea un robo n’e cas di e victimanan.
Y ta Laura, un di esunnan asesina y yiu muhe di e otro dos victimanan, ar evela sin cu e kier n’e acusadonan cu su tata tabata warda na cas un coleccion caro di holoshi.
E tres acusadonan a drenta pa horta e cas diasabra anochi. Tabata ora cu e famia a descubri nan, Fernando P.F. a hinca e tres victimanan salvahemente, n’e punto cu e tambe a sufri herida na su man despues di a corta su mes cu machete cu el a uza pa comete e crimen.
Polis a señala cu despues di a comete e crimen, e acusadonan a cende e cas na candela pa destrui prueba. E candela lo a cuminsa pa 3:32 di marduga y a notific’e mediante e number di emergencia 112. Tabata pa 5’or y 10 di mainta, cu e bomberonan di Azuqueca de Henares por a pag’e: eynan nan a ripara cu tabata trata aki di un asesinato.
Supuestamente e ruman homber di e hoben asesina a logra sali cu bida di e incidente y tabata e t’esun cu a yama emergencia y autoridad p’e echonan.
Acusadonan p’e asesinato
Windybeth Bonny Guaidó a wordo deteni hunto cu e dos hombernan, pa kende a decreta prizon provisional comunica y sin fiansa, mientras cu Bonny a keda den libertad cu e obligacion pa aparece dilanti corte e dianan 1 y 15 di tur luna, cu e prohibicion di salida di e teritorio nacional Spaño y a kita su paspoort.
E tres investigadonan a wordo acusa di manera provisional como supuesto autornan di e tres delitonan di asesinato, delito di robo cu violencia den un cas habita y delito di candela.
E acusacionnan ta provisional y lo concretisa a lo largo di e investigacion hudicial estando ne momento ey e instruccion den un fase hopi inicial.
E hues instructor ta mantene e procedemento hudicial habri bao secreto di sumario cu ta afecta e totalidad di e diligencianan di investigacion cu nan ta practicando. Segun e fuentenan yega n’e investigacion, e autor material di e echonan tabata Fernando F.P., mientras cu David y e supuesto prima di Guaido, tabata encubrido.