Willemstad Curacao: Resientemente un total di 90 kursista mas a risibí nan sertifikado komo parti di e programa di training Her & Bijscholingstraject Hospitality Sector. E kursistanan a sigui un kurso kòrtiku intensivo (crash course) den kua nan a haña konosementu básiko teorétiko i tambe práktika pa por drenta e industria di hospitalidat. Ta trata di 34 asistente kòki, 11 asistente bartènder/weiter, 25 artesano, 11 Hosts i 9 persona ku a risibí nan sertifikado di Leermeester (instruktor). Durante un seremonia ameno, Minister Charles Cooper enkargá ku desaroyo ekonómiko, huntu ku CTB a hasi entrega di sertifikado na e partisipantenan.
E kursonan di asistente kòki i asistente bartènder/weiter tabatin un durashon di 6 siman. Durante e kurso di asistente kòki, a trata e téknikanan básiko di preparashon di kuminda. E kursistanan ku a sigui e kurso di asistente bartènder/weiter, a siña entre otro e téknikanan di bartènder, tuma i sirbi pedido i kon pa duna servisio di kalidat. Tambe nan a sigui un Personal Empowerment training dirigí riba desaroyo di nan abilidatnan interpersonal. E partisipantenan tur ta trahando aktualmente na un kompania (leerbedrijf) den industria di hospitalidat pa un periodo di 5 luna i ta risibí un salario. Despues di e 5 lunanan, e kompania tin e posibilidat pa ofresé e partisipante un kontrato di trabou basá riba su prestashon.
Tambe a tuma lugá e kurso di artesania ku un durashon di 5 siman. E partisipantenan a siña diseñá i krea nan propio artesania ku produktonan natural i lokal. Ademas nan a sigui un kurso di Empresa Chikí ofresé pa MEO. E kurso di artesania a keda klousurá ku partisipashon na e Kaya Kaya Festival. Pa promé biaha a ehekutá e kurso di host. Ta trata di un kurso kòrtiku ku a keda inkluí mirando e demanda pa esaki. Tópikonan a inkluí: komunikashon, konosementu general di nos pais Kòrsou, historia, kultura i servisio na kliente. Un seshon di informashon di SOAW tokante e derechonan i obligashonnan di e empleado i e doño di trabou huntu ku presentashonnan di CTB referente merkadeo i e produkto turístiko tambe a forma parti di e totalidat. Por último, un grupo di 9 trahadó den e industria di hospitalidat a risibí nan sertifikado di Leermeester training. Ta trata di e personanan ku ta responsabel pa guia e kursistanan na nan leerbedrijf.
E programa di training ta resortá bou di Ministerio di Desaroyo Ekonómiko (MEO) i Ofisina di Turismo di Kòrsou (CTB) ta responsabel pa e implementashon. E programa ta keda ehekutá den estrecho kolaborashon ku Ministerio di Labor (SOAW), Ministerio di Enseñansa (OWCS) i partnernan den sektor privá. Pa registrá pa un di e kursonan bai riba www.curacaotouristboard.com/education/
