Ayera Aruba Entertainment 2020 y Crisis Team a bolbe reuni riba desaroyonan di mundo di entretenimento na Aruba. Siman pasa a logra bastante cu reunionnan importante cu diferente departamentonan, a sinta un biaha mas y regla e asunto pa e musiconan cu ta mastanto biba di musica pa asina nan por ta sigur cu lo haya nan FASE.
E grupo a yuda esnan cu tabata tin problema cu cierto documentonan, un cantidad bastante considerabel di unda un 90% porfin despues di casi 7 luna di pandemia, pa prome biaha lo cobra nan fase. Ofo Escudero di e grupo Aruba Entertainment 2020 a laga sa cu nan a sinta tambe cu Cuerpo Policial siman pasa pa asina tambe comunicacion ta habri.
“Nos tabata den negociacion pa 3 of 4 siman caba cu crisisteam caminda cu tabata permiti solamente un musico, awor desde siman pasa caba el a wordo cambia pa tres entertainer cu por duna show na mesun tempo”, sr. Escudero ta bisa.
Musiconan y otro personanan cu ta gana nan pan na hotel bailando, tambe tin derecho di por tin tres hende na mesun tempo. Aruba Entertainment 2020 a duna un proposicion pa asina Crisis Team por bay evalua tur locual a wordo treci dilanti, pa mira kico por saca afo den e siguiente dianan aki.
E meta principal ta pa pone mas entertainers cu por na pia di trabao bek, pa asina tambe por cuminsa tin un tiki mas alivio. “Nos sa cu nos por ta un tool hopi bon trahando conhuntamente cu Crisis Team y tur nan protocol, nos tambe por yuda na bisa e pueblo pa complace, unabes nos ta eherciendo e trabao y ta na cierto evento, nos por conscientisa e pueblo tambe, no cu si nos ta na cas cu nos ta un boca menos”, sr. Escudero ta splica. Ta bayendo den bon direccion y Aruba Entertainment 2020 ta pensa cu tin un luz berde na caminda, tin cosnan bon ta bay pasa, y mester tin un tiki pasenshi. Pronto lo tin algun desaroyo nobo tambe pa wak con por sigui, y ta pidi tur entertainers pa cumpli cu tur loke Crisis Team ta pidi pa poco poco por bay bek na un normalidad.