REPUBLICA CENTRAL AFRICANO – Durante un accidente di trafico den e Republica Central Africano (RCA) diamars, por lo menos 77 persona a perde nan bida. Un truck di carga cu tabata transporta tanto hende como articulo a accidenta. Tambe 60 persona a keda herida den esaki, Dokternan sin Frontera a meld na AFP.
E truck di carga tabata riba caminda entre e ciudadnan di Bambari y Ippy na un mercado y di un manera of otro a accidenta. Servicionan di rescate a bin na e sitio pa asina alberga e victimanan. Con e incidente aki a tuma luga, ainda ta desconoci. Segun autoridad e truck di carga a wordo carga dimas. 59 curpa a wordo hiba hospital. 18 victima a wordo dera na e sitio. Mayoria di e victimanan tabata hende homber. Alcalde di Bambari a comenta riba e incidente: “Un vehiculo cu 10 wiel a transporta toneladanan di producto y hende na e mercado semanal di Maloum. Despues e vehiculo a cay di patras cu tur e carga.”
Esaki ta pa prome biaha cu un accidente di e escala aki lo a tuma luga den e area. Pasobra cu tin poco transporte pa hende den RCA, bus y trucknan hopi biaha ta wordo sobrecarga. Door di esaki hopi biaha ta sosode accidente. Na RCA ya pa un tempo largo tin inkietud. Milicianan rival Cristian y Islamita ta den lucha contra di otro. Dies di miles di hende mester a huy di e pais door di e violencia.
Fuente: www.nrc.nl