E problema di delincuencia hubenil (“jeugd delinquentie”) ta un prioridad pa Joselin, pasobra den su trabou di abogado el a hay’e den varios ocasion ta defende hoben cu a horta, haci atraco arma, joy-ride auto, bende droga, trafica droga y asina mas. E hobennan aki ta entre 13 pa 18 aña. Si ta prome biaha cu nan a haya nan confronta cu husticia, hopi biaha nan ta tene nan 10 dia den cel na warda di polis y despues nan ta laga nan bay, claro depende e delito cu nan a comete. Pero si ya nan ta un persona cu a cay cera mas biaha (“recidive”), e ora depende e crimen, nan por haya lunas of hasta añas cera den KIA.
Den KIA nan ta keda cera hunto cu e adultonan. Den KIA no tin oportunidad pa nan studia ni caba ningun estudio. Nan por wak TV y bay gym tur dia, esey ta tur loke KIA ta brinda nan. Lo peor ta cu ora e hoben sali, ningun scol ta accept’e mas y ningun doño di trabou ta tum’e na trabou tampoco, cu consecuencia cu e hoben ta sigui haci actonan criminal.
Na aña 2012, Hellen A. Van der Wal a haci un investigacion na loke ta causa e problema di comportacion di e hobennan cu ta cay cera y kico ta e risico di no yuda nan. E rapport aki ta uno conoci pa e gobierno actual cu a pon’e un banda y haci mescos cu esaki no ta un problema real.
Pa Joselin e ta un prioridad pa bin cu un centro di detencion pa hoben cu ta duna nan e oportunidad pa rehab, bay scol, caba un estudio pa nan por bolbe drenta e comunidad den un forma positivo, pa asina nan no haci daño na nan mes, nan famia, nos turistanan y na e comunidad.
Mes importante, segun e rapport di Van der Wal, ta pa traha den un forma preventivo. Pa di trempan cu yudansa di scol y trahadonan social pa yuda e hobennan problematico y of adicto.
Joselin ta kere den un solo centro multidisciplinario cu por yuda preveni y coregi hoben problematico den un centro moderno cu personanan experto riba e tereno aki.
Aunque no tin cifra conoci di cuanto hoben ta cay cera pa aña of cuanto hoben a haya nan den problema na Aruba, comunidad y maestronan mes ta vocifera cu e ta un percentahe hopi halto.