Diasabra 18 di Maart ultimo piscadonan di Spaans Lagoen a invita henter Aruba gosa di un grandioso celebracion di Himno y Bandera cu un tremendo torneo di pesca y dia di famia. Tabata for di oranan di marduga cu botonan di varios centro a sali bay pisca pa bolbe atardi na e centro na Spaans Lagoen, Pos Chikito y trece gran cantidad di pisca tera pa busca ken ta e Rey di Djampou di Aruba.
476 KILO DI DJAMPOU
Un total di 22 boto a participa cu un total di mas di 65 participante. Na final a registra un total di 677.7 kilo total di pisca. Un impresionante 476.25 kilo di esaki tabata djampou. Di esakinan tabata tin varios ehemplar riba 4 kilo y esun mas grandi di e torneo a resulta di ta un djampou hala geel pisando 13 kilo di e boto pochito di capitan M. Carolina cu a bay cu varios premio.
MAYOR EHEMPLAR
Ademas di djampou tabata tin varios premio pa ehemplarnan mas grandi. E djampou rab’i gay mas grandi, un premio patrosina pa Baranca Boat Fishing Aruba, a bay pa e boto Tonino di capitan Q. Briesen cu 5.75 kilo. D. Carolina di e team Kamel Boys a bay cu e mulato mas grandi na 15 kilo y alabes e picuda di mas grandi cu 1 kilo. Pisca cora mas grandi a pisa 9 kilo treci tera door di e boto Rashell di capitan A. Albertsz. Ayana di capitan R. Paskel a bay cu e ehemplarnan mas grandi pa Brasi (11kg) y Dorado (5kg).
GANADONAN TOTAL KILAHE OVERALL
E ganadonan pa total kilahe overall a resulta den secuencia di 3 luga pa prome di ta: e boto Angelica di capitan J. Laurence cu 79.25 kilo di pisca; di dos luga pa e boto Gabriela di e capitan V. Carolina cu 89.5 kilo; y na prome a luga pa overall kilahe a keta capitan R. Paskel di boto Ayana cu 91.75 kilo di pisca di tur tipo.
REY DI DJAMPOU
E premio maximo buscando e Rey di Djampou a keda determina pa e cantidad total di djampou gara. Den esaki a keda na di 3 luga, e boto Shartyse di capitan R. Geerman cu a trece tera 64 kilo di djampou. Na di dos luga a keda e boto Ayana di capitan R. Paskel cu a trece 67.75 kilo di djampou. Ayana a bay tambe cu e pot entre e piscadonan. Na prome luga y titulando e Rey di Djampou a keda e boto Angelica di Capitan John Laurence cu a trece un total di 76.75 kilo di djanpou den un dia di pesca.
BALUARTENAN HOMENAHEA
E piscadonan di Spaans Lagoen a haci uso di e oportunidad pa rindi homenahe na 4 piscado di eybou, na nan forma di papia. Esakinan tabata: Alberto “Beto” Ras, Alfons “Fon” Henriquez, Victor “Vito” Carolina y Alfred Leslie. Tur a ricibi un homenahe y tambe un plakkaat pa nan contribucion na piscamento y tambe e centro na Pos Chikito.
GRADICIMENTO
Ademas di e premionan aki tabata tin varios premio rifa entre e participantenan, manera gift certificate di Pomp station Santa Cruz, Boat and Fishing Paradise, SETAR, WEMA, Palmera, East Wind Marine Services, De Palm Tours, Pelican Watersports, Budget Marine, Tropical Bottling, Balashi, Heineken, Elmax, Lotto Aruba, Wine and Dine, Fruteria Virgilio, Superfood, Mangel Halto Bar Restaurant, Unicon, Crown, BBFA y Fundacion Centro di Pesca Hadicurari. E organisadornan a wak atras na un exitoso evento y ta gradici tur esnan cu a contribui na haci esaki posibel. Un danki special na tur e voluntarionan como tambe tur e sponsornan.