Den un sala completamente yen famia y coleganan a bini hunto pa entregamento di diploma na 62 Agente policial. Un grupo grandi di polis parti den diferente klas a haya nan diploma den presencia di Minister di Enseñansa y deporte Sr. Endy Croes, altcomisario di polis drs. Ramon Arnhem y hefe di Scol di Polis E.J. Watty Vos.
E agente policial cu a haya nan diploma tabata parti den diferente klas y funcion cono manera: entrega di diploma Basico di Polis, a termina nan estudio policial nivel cuater di MBO y a termina estudio policial di Hoger Kader Opleiding (HKO).
E prome klas cu a ricibi nan diploma basico di polis ta studiantenan di aña 2021. Nan ta studiantenan cu ainda ta den proceso cu nan estudio policial, awor aki a termina nan prome dos aña y ainda falta dos aña mas pa sigui studia.
Studiantenan di klas 2019 a termina nan estudio policial MBO nivel cuater cu exito. Aruba ta haya polisnan hoben, dynamico cla pa subi caya y sirbi Pais Aruba dignamente.
Tambe e ultimo grupo di polis cu a haya nan diploma ta e klas cu a termina estudio policial di Hoger Kader Opleiding. Esaki nifica Cuerpo Policial Aruba a crea lidernan nobo pa sigui guia e cuerpo pa e futuro generacion. Esakinan ta e polis cu lo carga e futuro di nos cuerpo dor di guia e hobenan di nos cuerpo pero tambe pa hisa e calidad di KPA.
Pa altocomisario di polis drs. Ramon Arnhem e ta mira bek cu orguyo cu tres diferente klas ta hayanan diploma. Tres diferente klas cu hoben y profesional cla pa haci un cambio pa e organisacion. Cada momento ta uno special pero esaki ta e momento cu famia a presencia un capitulo nobo di nan ser keri, alaves nunca un polis ta caba di studia pero ta sigui amplia nan conocimento pa por brinda un mihor servicio na nos comunidad. Pa den futuro nos por mira bek e simiya cu nos a planta a crece y cosecha fruta pa e siguiente generacion.
Masha pabien na tur 62 agentenan cu a ricibi nan diploma y ta cla pa un etapa nobo den nan carera policial. Tambe nos kier felicita cada un famia di e agentenan pa nan sosten brinda na cada un polis. E tarea cu nan tin no ta facil sin e sosten fuerte di nan famia. Hopi exito y sigui brinda lo mihor pa Pais Aruba.
