Pa mi ta un honor grandi pa dirigi mi mes na boso awe cu nos ta celebra e di 60 aniversario di Federacion di Trahadornan di Aruba. Pa 6 decada nos a sa di para hunto, man den man, defendiendo husticia social y derechonan di e clase trahador. Awe nos no solamente ta conmemora nos logronan di pasado, pero tambe nos ta reafirma nos compromiso na e balornan duradero cu a guia nos.
Riba 22 di juli di 1964, 60 aña pasa, 5 compañero, Wijkie Maduro, Fefe Bareño, Chinto Diaz, Ruffo de Cuba y Rosendo Colina a bin hunto cu un vision comun. Nan tawata ambiciona pa un mundo den cual trahadornan ta wordo trata cu dignidad, unda cu salarionan digno y bon condicionnan laboral no tawata simplemente un aspiracion sino un realidad. Nan curashi y determinacion a forma e fundeshi riba cual FTA a wordo construi. Nan a realisa cu forsa ta resulta for di unidad y por medio di nan esfuerzonan colectivo, nan a cuminsa un movimento cu pa semper a cambia e mundo laboral na Aruba.
Durante añanan nos a confronta hopi reto. Nos a haya nos cu oposicion y adversidad, pero semper nos a sa di surgi mas fuerte. Nos victorianan semper tawata resultado di lucha duro y determinacion, pero nan a haci un impacto grandi riba bida di numeroso trahadornan y nan famia. Di para pa pago husto te percura pa un entorno di trabao sigur, di demanda beneficionan di salud te exigi seguridad di trabao, FTA semper a sa di ta vanguardia di e movimento laboral.
Nos trayecto a wordo marca pa logronan significante. Nos a sa di negosha acuerdonan cu a set normanan di e industria. Nos a reuni, marcha y protesta, haciendo asina nos voz resona duro y cla. Nos a participa den dialogonan importante cu dunadonan di trabou y gobernantenan, defendiendo legislacion y regulacionnan cu ta proteha derechonan di e trahado. Cada logro ta testimonio di nos compromiso y solidaridad inquebrantabel.
Pero awe no ta solamente pa celebra nos logronan di pasado. E ta tambe un momento pa wak padilanti, pa imagina e futuro cu nos kier construi hunto. E mundo di trabou ta cambiando rapidamente, cu tecnologianan nobo y industrianan den evolucion. Segun nos ta nabega e cambionan aki, nos mision ta keda mescos: pa proteha y mehora e derechonan di clase trahador.
Nos mester sigui ta vigilante, inovativo y resiliente. Nos mester adapta na retonan nobo mientras nos ta keda fiel na nos principionan central. Nos union lo ta nos forsa di mas grandi segun cu nos ta para pa salarionan husto, lugarnan di trabou sigur y oportunidadnan igual. Nos mester percura pa e voz di e trahador wordo scucha den empresanan, cerca nos gobernantenan y den organonan legislativo di nos pais.
Laga nos corda tambe cu FTA no ta djis un organisacion; e ta un comunidad. E ta un famia cu ta wordo teni hunto door di balornan comparti y respet mutuo. Nos mester sostene otro, halsa otro y para solidario cu tur trahador, tanto nos miembronan como e clase laboral en general. Nos forsa ta sinta den nos diversidad, y hunto, nos por supera cualkier obstaculo.
Mientras nos ta celebra e logro aki, laga nos honra tambe esnan cu a bini prome cu nos, esnan cu a pone e base pa e derechonan cu nos ta disfruta di nan awe. Laga nos tambe celebra cada un di e miembronan di FTA, kende nan dedicasion y trabou duro a haci e dia aki posibel. Boso compromiso y pasion ta e forsanan impulsor tras di nos exito continuo.
Pa clausura, laga nos reafirma nos promesa pa lucha pa husticia, pa mantene e dignidad di labor, y pa sigura cu cada trahador ta wordo trata cu e respet cu nan merece. Hunto, nos lo sigui construi un futuro caminda derechonan di trahadonan ta wordo proteha y nan contribucion ta wordo balora.
Pa otro 60 aña di solidaridad, forsa y exito.
- Latest
