Nos ta pasa casi e mita di dia hinca den un oficina. Y paradohicamente, ta e luga caminda nos ta adopta e habitonan menos saludabel: come malo, move poco, nos ta angustia hopi… Ta posiber reverti e tendencia eynan? Claro cu si. Si tta bon, tin algun cos cu nos no por evita – manera nos ta stress de bes en cuando -, tin hopi otro cos cu nos por stop di haci pa sigura cu nos hornada laboral ta hopi mas beneficioso pa nos salud. Tuma nota!
Come junkfood
Ta pasa cu nos tur: pura pa resolve miles di trabao, nos ta pasa oranan largo sin come of, pio ainda, nos ta sacia nos apetit cu un saco di chips, chuculati of poco buscuchi saludabel. Si esaki pasa de bes en cuando, no lo tin problema, pero esaki ta sosode dia tras dia, siman tras di siman, aña tras aña… E consecuencianan di come junkfood cu frecuencia, ta sobrepeso, riesgo di sufri diabetes, incapacidad pa concentra y ansiedad, entre hopi otro cos.
No para na bo luga
Un di e pio habitonan cu nos a adopta trahando den un oficina ta keda oranan largo sinta tras di un desk. E falta di mobilidad tin un sin fin di consecuencia negativo pa salud: aumento di peso, rigidez muscular, barica cera, infeccionnan urinario… Bo mester di mas rason pa strecht y cana por lo menos un biaha pa ora?
No bebe suficiente awa
Laga nos rey: ya cu bo ta hopi ocupa, ta facil pa bo lubida di bebe awa y pa bo pasa oranan sin purba un solo druppel. Esaki por afectabo hopi mas di loke bo ta kere: bebe poco awa por trece problemanan grave na bo niernan, promove migraine y atrasa bo metabolismo, entre hopi otro cos. Sigura bo mes pa tuma por lo menos 8 glas di awa pa dia.
Come na bo desk
Con nos ta come, ta casi mesun importante manera kico nos ta come. Ora cu bo aleha di bo desk (aunke ta pa algun minuut) y bo ta papia cu mas hende, bo celebro ta descansa, bo pensamento ta claria y bo ta recarga energia, pa ora cu bo bay bek na bo luga di trabao, lo bo sinti bo mes mas relaha y ta mas productivo. Por lo contrario, come na bo desk ta motivabo pa bo come di forma lihe, sin disfruta di bo alimentonan y sin duna bo celebro su merecido descanso.
Keda mas tempo na oficina
Ningun hende ta duda, bo tin mil pendiente riba bo lomba. Pero kedando mas ora na oficina, no lo haci lihe e carga di trabao (nos ta sorry pa desilusionabo, pero e trabao nunca lo caba). Por lo contrario, labora den exceso y relega bo tempo solamente lo haci pa sinti bo mes mas abruma, menos feliz cu bo trabao y por supuesto, menos productivo.
Bebe mas di 5 kopi di koffie pa dia
Bo ta di e hendenan cu ta tuma te cu cinco kopi di koffie pa dia? Bo lo ta dañando seriamente bo salud. Si ta bon, ta berdad cu koffie ta mantene bo mes lanta, mehora bo memoria y bo funcionnan cognitivo, tambe loke ta den dosis hopi halto, ta produci excitacion, ansiedad, insomnio, gastritis y otro trastorno. Sigui e conseho di e expertonan y evita di bebe mas di cuater kopi pa dia.
Fuente: www.entrepreneur.com