Diabierna mainta via video conference, Hues a dicta sentencia den e caso penal cu Ministerio Publico a cuminsa contra e hombernan S.G.(21) y A.M. (23).
MAS NOTICIA por a compronde cu Hues a baha e castigo pa e acusado A.M. compara cu loke Fiscal a exigi pero a confirma e castigo exigi pa S.G.
FISCAL
Algun siman pasa tratamento di e caso a tuma lugar caminda Fiscal a bisa Hues cu atrobe ta sosode un otro “drive by shooting”. Danki cu ningun hende a resulta herida. El a bisa cu 2022 tabatin hopi caso di “drive by shooting”. Tambe tabatin casonan di tiramento caminda dos persona a wordo asesina. El a remarca cu durante investigacionnan e nomber di S.G. tambe ta wordo menciona. Den caso 16 Juli 2022, Polis a wordo informa di e tiramento na Sabana Basora. Polis a mira e auto y a surgi un persecusion. Na Pos Chiquito, A.M. y S.G. a baha core na pia y Polis a logra detene nan. A haya muestra di a tira cu un arma riba man di A.M. Tin video di seguridad cu ta mustra con e auto a pasa poco poco y a tira di serca riba e homber J.G.C. cu tabata para dilanti di su auto. Fiscal a bisa cu ta A.M. tabata stuur “right drive” y tabata na banda di J.G.C. Fiscal a bisa cu e no ta kere declaracion di A.M. cu ta un tal Shac a tira. Na opinion di Fiscal, for di investigacion no por saca afor kico tabata e funcion di S.G. Ta A.M. ta esun cu a tira. E ta haya S.G. culpable di posecion di arma y tambe A.M. Fiscal ta haya cu e declaracion di J.G.C. y imagennan di video ta mustra cu ta A.M. a tira. E ta haya A.M. culpable di intento di asesinato. Fiscal a bira cu tira riba distancia hopi serca, por causa morto di hende. Tur cos ta mustra cu a tira ariba J.G.C. A haya impacto di bala riba bentana. E hecho cu ningun hende a resulta herida, ta un casualidad.
Pa cu castigo, Fiscal a bisa cu e ta tene cuenta cu A.M. tin un condena caba pa posecion di arma. Esaki segun Fiscal ta mustra cu A.M. no a siña. El a pidi pa ehecuta e 3 luna di prison condicional di e condena anterior. Fiscal a bisa cu tiramento ta un problema serio na Aruba. Recien tabatin dos morto door di tiramento. Pesey Ministerio Publico ta baha cu man duro. Pa tin arma e castigo ta 2 aña di prison y pa purba asesina un hende e ta 8 aña di prison. El a mustra cu recien a condena un homber na 8 aña di prison pa drive by shooting. El a exigi pa S.G. 18 luna di prison di cual 6 luna ta condicional cu 3 aña di prueba. Pa A.M., Fiscal ta considera un recidivista y a exigi 10 aña di prison. Fiscal tambe a exigi pa destrui e arma y e auto lo mester keda confisca.
SENTENCIA
Hues a bisa cu pa S.G. a keda legal proba cu riba 16 Juni 2022 e tabata den posecion di arma y municion. Pa cu e castigo, Hues a tene na cuenta cu posecion di arma di candela ta pone henter comunidad na peliger. E ta haya cu castigo combina lo ta na su lugar. Hues a condena S.G. di acuerdo cu Fiscal, 18 luna di prison di cual 6 luna ta condicional cu un tempo di prueba di 3 aña.
Pa loke ta A.M., Hues ta haya legalmente proba cu 16 Juni 2022, A.M. a purba mata y posecion di arma di candela. Pa cu e castigo, Hues a tene na cuenta cu a purba mata hende, door di tira den direccion di un persona. Danki cu ningun hende no a wordo herida. Hues a bisa cu e tiramento a tuma lugar den un aerea caminda hendenan ta biba. E ta haya cu A.M. no a tene cuenta cu lo por a herida esun cu el a tira riba dje of otronan den vecindario. Hues a bisa cu victimanan den caso asina lo por keda afecta. Posecion di arma di candela ta crea sentimento di inseguridad den comunidad.
Tambe Hues a tene cuenta cu durante tratamento di e caso cu A.M. tabata keda desmenti di a haci e hecho. Ademas a haci esaki den su tempo di prueba pa un caso di violencia. Fiscal a pidi pa ehecuta e castigo condicional pendiente. Hues a condena A.M. na 6 aña di prison, kitando e tempo cu e ta sera. Tambe Hues a ordena pa ehecuta e castigo condicional di 3 luna aserca. E arma y balanan lo wordo destrui. E auto lo mester debolbe na su doño.
