E grandioso torneo internacional 5th Caribbean 35 + Women Softball Tournament organisa pa e hala femenino di Aruba Juniors esta Aruba Juniors Impex-Thiel Angels lidera pa Mila Martinus a termina cu un tremendo partidaso den final. Despues cu a inicia weganan riba diabierna hungando un wega tras di otro e dos ekiponan fuerte di Corsou a topa otro den e gran final. Treasure New Era ta gana Nos Goso den un wega di “toma y dame” cu score di 17-16. Fanaticada a biba cu tur emocion di e wega pa 7 inning largo. Den e wega pa tercer y cuarto lugar New Angels di Boneiro ta gana Impex-Thiel Angels di Aruba cu score di 11-6 pa asina reclama e di tercer puesto. Mesora organisadornan a bay over na entregamento di premio unda Sra. Chama Flurton di St Maarten a conkista e titulo di Champion Batter mientras cu Nymphette Josephia di New Angels di Boneiro a bay cu e titulo como Champion Pitcher. Despues a yama dilanti Sra. Minerva Maduro di e ekipo cu a titula campeon esta Treasure New Era di Corsou na kende a otorga e premio di MVP. Finalmente a entrega e trofeonan di Sub Campeon na Nos Goso y esun di Campeon na Treasure New Era ambos di Corsou. A continua cu un ambiente unico bailando te den oranan di anochi unda ekiponan internacional y esnan local hunto cu nan fanaticada por a gosa un bol. Un palabra di pabien na henter e comision organisador kendenan a traha incansablemente pero tambe na e motor tras di e evento aki Sra. Mila Martinus. Alabes un palabra di gratitud na tur e sponsornan kendenan a coopera dunando nan aporte pa por a logra organisa e di 5th Caribbean 35+ Women Softball Tournament. Adhunto por aprecia algun potret bunita di e clausura di e mahestuoso torneo. Pabien.