MERCA – Yahoo a confirma diahuebs cu informacion a wordo horta “asocia cu por lo menos 500 miyon di cuenta di usuario” caminda cu por ta un “breach” di cybersecurity mas grandi di historia.
E compania a bisa cu e ta kere cu un “actor di Estado” ta trad di e violacion aki, dunando di compronde cu tabata un acto individual den nomber di un Gobierno. E hechonan a sosode na final di 2014, segun e compania.
“E informacion di e cuentanan por inclui nomber, adres di email, number di telefon, fecha di nacimento, algoritmonan di password y den algun caso pregunta y respuesta di siguridad encripta of desencripta,” Yahoo a bisa den comunicado.
Yahoo a pidi su usuarionan pa camia nan password y preguntanan di siguridad, ademas di revis nan cuenta den buskeda di actividad sospechoso.
Na Augustus ultimo tabata tin e rumor pa prome biaha riba un gran “breach” di cybersecurity ora cu un hacker cu a identifica su mes bao di e nomber di “Peace” a bisa cu e tabata bendiendo informacion riba internet di 200 miyon usuario di Yahoo.
E mesun hacker a bisa cu anteriormente e tabata bende cuentanan horta di LinkedIn y MySpace.
Originalmente Yahoo a bisa cu e tabata “na altura di e informacion aki” y cu e tabata investigando e situacion.
Casi dos luna despues, e situacion a resulta ainda mas pio.
Fuente: CNN en Español