5 di december ta un dia special cu desde aña 1986 ta pone atencion na e trabou haci cu ta sali di curason y cu e persona cu ta haci e trabou no ta haya ni un cen preto pa su esfuerso. E posicion aki nos ta yama Boluntario.
Un boluntario ta duna di su tempo liber pa sirbi na otro hendenan cu mester di yudansa. Tambe ta haci uso di su capacidadnan pa siña otro, loke cu e sa haci sin ricibi un pago pe. Hopi biaha boluntario ta duna su trabou na instancianan caricativo y sin fin di lucro.
Aunke cu ta desde aña 1986 e acto aki di boluntarismo haya su reconocimento internacional cu ariba 5 di december e boluntarionan ta haya nan atencion, esaki ta algo cu tabata existi desde semper unda cu unda cu mester duna un man semper tabata tin gruponan di hende cu tabata cla pa yuda.
Entre otro den misanan y fundacionnan te ainda nos ta tende cu mester di boluntario. Antes cu e señoranan di cas no tabata por a traha ora cu nan casa. Pa nan no keda cas so, nan tabata drenta diferente organisacionnan como boluntario pa yuda gruponan di clientenan durante actividad of tambe como chauffeur.
Awendia cu tur hende ta torah ta mas dificil pa haya boluntario pa yuda den organisacionnan manera antes, pero si ta encurasha esnan cu ta baha cu pensioen, pa no sinta na cas. Tuma un momento di descanso pero despues ta bunita pa yuda un otro instancia cu mester di bo pa duna alegria na clientenan, kendenan e personanan cu mester di nos pa yudanan sali for di nan cas.
Un ehempel ta sra Jean Porino kende nos a entrevista y cu otro aña ta haci 45 aña haciendo trabou boluntario banda di a wak pa su yiunan tempo cu nan tabata mucha, hibanan scol y tene su cas na ordo.