Recientemente Camara di Comercio y Industria di Aruba (KvK) a forma parti di un reunion cu e otro 4 camaranan di comercio di e 6 islanan den Reino Hulandes cu ta forma parti di e “Association of Dutch Caribbean Chambers of Commerce and Industry (ADCCCI). E reunion a tuma luga na e Camara di Comercio di Curaçao y tabata hopi fructifero. Sr. Dick ter Burg tabata presente di Boneiro. Sres. Marcos Cova y John Jacobs y sra. Kirsten Römer di Curaçao, sr. Anastacio Baker di St. Maarten, sr. Carlyle Tearr pa Saba y Statia y pa Aruba tabata presente sra. Sonja Velthuizen y sr. Ernst Mohamed.
Durante e reunion aki a elegi e personanan cu lo forma parti di e directiva nobo di ADCCCI. Como presidente a keda eligi sr. Willem (Billy) Jonckheer di KvK Curaçao y e secretario di directiva a keda den persona di sr. John Jacobs di KvK Curaçao sr. Dick ter Burg di KvK Bonaire a bira e tesorero.
E asociacion tin como meta principal pa crea mas cooperacion entre e islanan den Reino y mehora comercio di cada isla. A discuti encuanto fondonan manera COSME di Union Europeo pa facilita financiamento y brinda oportunidad na empresarionan, en particular e empresario hoben. Entre e islanan mester tin bon comunicacion pa mehora comercio. A trece dilanti oportunidadnan cu tin por medio di organisacionan manera Qredits cu ya ta estableci na Aruba pa brinda financiamento na e empresario. E otro islanan tambe lo wak e posibilidadnan cu esaki ta ofrece. A compara e nivel di dificultad cu ta existi pa por yega na un permiso ora di lanta un negoshi. Den esaki a sali na cla cu Aruba y Curaçao ta e islanan unda cu tin hopi mas ‘red tape’ cu ta forma obstaculo pa por cuminsa un negoshi. A intercambia pensamento encuanto e desaroyonan pa loke ta e-commerce y e formacion di un incubador pa structura y brinda guia na negoshi nobo. A discuti e posibilidadnan pa uni y hunto confronta e obstaculonan cu tin pa cu turismo crucero y cu por engrandece y saca mas for di e turismo crucero entre e islanan y e ta importante pa e camaranan di comercio asisti na e conferencia Seatrade na Merca. E conexion entre e islanan tin cu brinda mas accesibilidad. Aviacion ta pasando den un periodo hopi turbulento cu ta afecta negoshi entre e islanan y pesey a elabora tambe riba e posibilidad di traslado comercial maritimo entre e islanan ABC. A discuti encuanto e sistema y mantencion di e registro di negoshi e.o. di negoshinan inactivo y tambe con por brinda un miho servicio na e cliente. E prijs y calidad di productonan tambe a wordo discuti.
E asociacion lo kier sigui den contacto un bes cada 3 luna via un “conference call” y tambe tene un bes pa aña un reunion caminda tur miembro por tey presente en persona.