E aña aki pa prome biaha Aruba ta participando como pais competido na e famoso proyecto internacional di 48 ora. E proyecto ta mundialmente conoci y e ta conta cu diferente paisnan competidor, incluiendo Curcao y Bonairo. Aruba lo ta e di tres isla den Reino cu ta bay forma parti di e proyecto aki. E 48 Hour Film Project Aruba lo ta bao di encargo di Fundacion CINEARUBA bao di guia di tanto 48 Hour Film Project Curacao y Bonaire. E tres islanan ta uni pa crea un conexion entre e habitantenan di cada isla. Na principio di october e proyecto lo wordo ehecuta simultaneamente na tur e tres islanan. Unda cu e team di participantenan lo tin 48 ora pa crea un pelicula a base di e rekisitonan duna riba e prome dia. Lo tin un nochi di entregamento di premio pa e miho pelicula y otro categorianan, pero tambe pa prome biaha lo tin un competencia entre e tres islanan. E miho pelicula di Aruba lo competi cu Curacao y Bonaire pa e miho pelicula di Dutch Caribbean. E pelicula y e team ganador di Aruba lo representa Aruba na e Filmapalooza 2020 na Rotterdam y si e pelicula cay den e diesdos mihonan, e lo participa na e festival di Cannes na Francia.
Riba diasabra 11 di mei entre 6.30 pa 7.30 di anochi na Ateliers ‘89 lo tin un presentacion na personanan cu ta interesa den participa den e 48 Hour Film Project Aruba. Ta buscando minimo dies team pa participa na e proyecto di e aña aki. Cada team por ta consisti di tres pa dies persona. Riba e anochi aki lo duna informacion tocante e rekisitonan pa por participa y lo splica mas con e proyecto ta hinca den otro. Tur persona ta bon bini pa haya sa mas di e proyecto aki cu sigur lo yuda showcase Aruba su talentonan local riba un plataforma internacional. Pa cual kier pregunta por tuma contacto via [email protected].