Durante conferencia di prensa Sr. Edwin Mohamed director di Arubus a duna di informacion riba e celebracion emblematico di e compania di transporte Arubano. Dia 1 di October 40 aña pasa historia di transporte publico a cuminza wordo skirbi. Tabata Gobierno Insular a realiza e compra oficial di e unico dos companianan di transporte cu tabata existi e tempo ey. P’asina centraliza y regula y optimalisa transporte publico riba Aruba. Di e manera aki a haci e prome paso pa structura e compania estatal di transporte esta e compania nacional di transporte cu awendia ta wordo conoci como Arubus NV. Segun Sr. Mohamed a sigui bisa pa un compania por existi 40 aña ta un reto na cualkier patri di mundo y den cualkier industria y sigur pa Arubus esaki no ta un excepcion. 40 aña cu hopi reto pero cu awendia ta siñando di nan pa diseña un futuro positivo y fructifero pa e compania Arubiano di bus, Arubus NV. Sr. Mohamed a bisa cu como director di Arubus den nomber di staff y personal kier a gradici Gabinete Wever-Croes cu a pone como un di su metanan pa restructura e compania Arubiano di bus p’asina duna e apoyo necesario pa por sigui brinda servicio na comunidad di Aruba. Pero sigur den un calidad mucho mas halto y confiabel. Awor caba por conta cu prome grupo di 15 bus di un total di 30 lo bai rehobenece e flota completamente. E busnan nobo ta ekipa cu WiFi, charging ports entre otro novedadnan y e busnan aki ta sumamente moderno y ta brinda e usario un experiencia nobo y diferente ora di haci uso di nan. Pero tambe pensando riba ecologia di Aruba a scoge pa busca busnan cu ta emiti menos daño posibel riba medio ambiente. Di e manera aki Gobierno di Aruba a di haci un inversion sumamente necesario den Arubus NV cu ta na beneficio di comunidad en general y lo sa di impulsa productividad di e compania. Sr. Mohamed a sigui bisa cu awe mester ta orguyoso cu tin un compania estatal cu apesar di su retonan, cu tur hende sa di dje, a sa di mantene su mes riba pia pa 40 aña caba y spera pa hopi aña tambe. Arubus NV a sa di transporta generacionnan pa 40 aña y lo sa di sigui transporta generacionnan cu lo bini den futuro. Tambe Sr. Mohamed a tuma e oportunidad aki pa expresa aprecio y duna felicitacion na tur e trahadonan cu a sa di pone nan esfuerso cu a yuda construi e pasado y presente y lo yuda pa nos futuro tambe. Un futuro cu ta premira mehoracionnan significativo y inovasionnan necesario p’asina por cumpli cu exigencianan actual di tanto e usario pero tambe di e empleadonan. Sr. Mohamed a sigui bisa cu danki na e trabao incansabel y compromiso di e empleadonan so e compania a logra cumpli 40 aña y cu tur e metanan cu tin poni pa e futuro di Arubus NV. “Boso trabao ta sumamente importante. Cada un di nos. Sumamente importante y esencial pa progreso di nos compania estatal di transporte”, asina Sr. Mohamed a declara. Por ultimo e director di Arubus kier a felicita tur cuidadano cu e 40 añanan di existencia di Arubus y lo sigui transporta generacionan den futuro. Y asina pabien na cada un cu a contribui cu awe por celebra 40 aña. E fecha oficial cu Arubus a cuminza funciona bao di e nomber di Arubus NV ta 15 di Maart, 1980 loke ta haci cu pa otro aña lo bai tin e celebracion grandi.