Crisis Management Office Aruba (CMO) ta informa e publico engeneral cu riba diahuebs, 14 di november, lo tuma luga un entrenamento nacional pa certificacion aeropuerto di Aruba.
E entrenamento aki ta inclui e participacion di tur e instancianan nacional relevante.
Entrenamento lo ta tuma luga den area rond di Waf Oranjestad, entre 6:00 pm y 11:30 pm. Areanan cu lo wordo uza ta riba tereno di waf, como tambe riba e lama dilanti di Waf Oranjestad.
Esaki ta un operativo di importancia nacional.

Coordinacion ta dor Crisis Management Office (CMO) hunto cu otro instancianan clave manera Brandweer, Polis, Imsan, Departamento di Salud Publico, Departamento di Asunto Social, Kustwacht, Aruba Airport Authority N.V., Aruba Ports Authority y Directie Luchtvaart pa garantisa siguridad y e capacidad di conocemento y material den caso di un incidente aereo.
Pa e proposito aki, lo ta evaluando e plan di respuesta nacional pa accidente aeronautico, cu participacion di diferente instancianan di emergencia. Pa e operativo aki lo ta uza ekipo avansa, y tambe tin e posiblidad cu un helicopter di Kustwacht ta forma parti den e ehercicio.
Nos ta pidi pa e usuarionan di caretera y esunnan cu ta opera den awa den cercania di Waf Oranjestad pa tene cuenta cu tin e posiblidad pa algun cambio den trafico, tanto riba tera como den lama. E alteracionnan temporal di trafico ta necesario pa mantene siguridad pa tur esunnan envolvi den e entrenamento y pa e publico.
CMO ta gradici e comprension y cooperacion di nos comunidad durante e periodo di entrenamento aki, cu ta fundamental pa asina aumenta siguridad y promove e capacidad di nos instancianan pa responde efectivamente den caso di un emergencia aeronautico.