E Agencia Meteorologico di Hapon a bisa cu e temblor a registra un magnitud preliminar di 7.1 y tabata centro fo’i e costa oost di e isla principal zuid di Japon di Kyushu na un profundidad di mas o menos 30km (18.6 miya).
E instancia a bisa cu olanan di tsunami di te cu 50 centimeter (1.6 pia) a wordo detecta canto di partinan di e costa zuid di Kyushu y e isla cercano di Shikoku mas o menos mei ora despues cu e temblor a tuma luga.
E temblor a sacudi mas fuertemente e stad di Nichinan y areanan den cercania di Miyazaki na Kyushu.
Sismologonan tabata tene un reunion di emergencia pa analisa si e temblor a afecta Nankai den cercania, e fuente di temblornan devastador di pasado.
Operadornan di plantanan nuclear na Kyushu y Shikoku a bisa cu nan tabata controla pa wak si tabatin cualkier daño na nan. Temblornan den areanan cu plantanan di energia nuclear tabata un preocupacion grandi desde cu un temblor y tsunami masivo na maart 2011 a causa e desaster nuclear di Fukushima.
E televishon publico NHK di Hapon a bisa cu tabatin informe di bentana kibra na e aeropuerto di Miyazaki cerca di e epicentro.
