Minister di Economia di Corsou, Ruisandro Cijntje, ta seriamente bergonsa p’e salida di tres di e cuater miembronan di e Raad van Commissarissen (RvC) di Aqualectra. Como accionista mayoritario di e empresa di awa y coriente, ta posibel cu e no por a responde adecuadamente n’e señalnan di problema relaciona cu e operacionnan di e empresa.
E RvC parce di a purba di yama atencion di e Minister riba e problemanan grave dentro di e empresa, incluyendo posibel iregularidadnan financiero y un falta di transparencia den su operacionnan comercial.
Esaki ta particularmente relevante mirando e papel di e Conseho di Supervision cu mester supervisa e maneho di e empresa y actua como un mecanismo di control clave pa garantisa cu e empresa actua na interes di tur e partidonan interesa, incluyendo e accionistanan.
IREGULARIDAD
Un informe reciente di Forensic Caribbean ta mustra e posibel delitonan penal cometi pa Darick Jonis, ex-CEO di Aqualectra. Segun e informe, Jonis a abusa na varios occasion di su podernan. E autoridad aki ta otorga e mando na un hende pa realisa accion den nomber di un empresa, manera firma contract. Jonis tabatin permiso pa tuma decision te cu un miyon florin, pero segun e informe tabata hopi mas.
Den un caso, sin conocemento di e otro miembronan clave di e hunta directiva, Jonis a firma tres contract cu NuCapital y Koraal Tabak Windparken pa mas di dies miyon dollar. Esaki ta casi binti biaha mas hopi cu su limite di autorisacion. “E accionnan aki nunca a wordo discuti cu e RvC y no tabatin autorisacion p’e transaccionnan aki,” e informe a bisa.
E informe di FC tambe ta destaca “disposicion inusual” den e contractnan y ta sugeri posibel acuerdo independiente cu tercera. Tambe lo a produci un negligencia grave den e compra di transformator grandi, pa cual Jonis lo a extralmita un biaha mas den su autoridad.
“E hallazgonan aki ta indica un negligencia grave den e operacionnan comercial y por indica fraude financiero y falsificacion,” e ex-miembronan di e RvC, Karel van Haren, Austin Martina y Patrick Aberson, a señala.
E informe tambe ta papia di “scondemento intencional di informacion,” loke ta mustra na gaña e RvC y e otro miembronan di e hunta.
FALTA DI BOLUNTAD
E aparente falta di boluntad di Minister Cijntje pa interveni of responde adecuadamente n’e informacion aki por mira como un falta di ehercicio di su responsabilidad como accionista mayoritario.
Esaki ta trece duda riba e eficacia di e supervision y e maneho di e empresa y por implica cu tabatin un falta di control y rindimento di cuenta adecua dentro di Aqualectra, loke a habri porta na supuesto violacion di parti di e ex-CEO.
Cijntje ta ataca den un comunicado di prensa y ta cualifica e salida di e tres miembronan di RvC di e abusonan den e empresa di servicio publico.
Cijntje ta contradeci e acusacionnan cu nunca el a responde e informe di RvC y ta afirma cu el a busca contacto na varios ocasion. E minister ta destaca cu el a insisti riba un investigacion riba Aqualectra, specialmente despues di diferente blackout cu tabatin aña pasa.
E minister ta haci referencia na un estudio anterior cu ya a revela problema cu e mantencion di e instalacionnan di Aqualectra. Segun e, esaki t’e base di e reciente “informe di investigacion forense condenatorio.” E ta afirma cu e RvC ta sigui ta parcialmente responsible di e abusonan observa cu a tuma luga bao di nan supervision.
Cijntje ta indica cu e miembronan di e RvC no por a duna un contesta satisfactorio na su preguntanan riba e retraso den e mantencion di e instalacionnan di Aqualectra. E ta considera cu e acusacionnan den e carta di retiro, ta mas bien falso y baho.