Autoridad migratorio di Colombia lo pone den marcha un protocol nobo p’e menornan cu ta biaha p’e pais aki, despues cu dos mucha Africano a wordo bandona den e aeropuerto Internacional di El Dorado na Bogota.
Den un comunicado di prensa, Migracion Colombia a informa cu a acorda pa crea un mecanismo pa proteha e derechonan di e menornan di edad migrante cu ta di transito door di e teritorio di e pais Sur Americano.
Autoridad migratorio a pidi reconoce e salanan internacional di El Dorado y a coordina e reglamento nobo aki cu e concesionario di e aeropuerto, Polis di Infancia y Adolescencia, e Instituto Colombiano pa Bienestar Familiar (ICBF) y e aerolineanan Turkish Airlines y Avianca.
DI KICO TA TRATA E PROTOCOL
E subdirector di control migratorio di e organismo aki, Martha Hernandez, a bisa cu e protocol nobo aki lo inclui entrevista den e salanan internacional “pa determina si e menornan di edad ta bin compaña” y lo tin “enfasis riba e casonan di famia.”
Den e caso unda cu lo determina cu e muchanan ta biaha nan so, lo activa un mecanismo pa atende e caso a traves di Polis di Infancia y ICBF.
Cu e medida aki ta busca e proceso di verificacion di e acompañantenan di e muchanan ta “mas riguroso” y cu ta garantisa nan proteccion.
PAKICO E DECISION AKI
Dia 18 di december ultimo, a haya dos mucha procedente di Guinea, cu a wordo bandona p’e adultonan cu tabata biaha cu nan den e Aeropuerto Internacional di El Dorado, den e capital Colombiano.
E menornan cu no ta famia di otro, a wordo haya nan so den diferente zona di e terminal aereo. E famianan di ambos ya a wordo ubica, segun e director di ICBF, Astrid Eliana Caceres, riba su cuenta di e plataforma X.
“A cuminsa un proceso cu ta tuma tempo pa compaña nan den e restitucion cu e ruta familiar,” Caceres a skirbi.
Desde di e suceso, a determina cu migracion lo encarga di establece protocol adicional na esunnan cu ya ta sigui pa garantisa e derecho di e mucha y e adolescentenan.