Recientemente Greg Peterson a haci entrega di buki “Bird Wildlife of Aruba” na Minister encarga cu Turismo Mike de Meza. Un buki unda cu el a documenta diferente parha na Aruba, asina poniendo e luz importante riba un di e motibonan cu mester preserva nos naturalesa. Minister de Meza a keda masha encanta cu diferente tipo parhanan cu ta ilustra den e buki y a gradici sr. Peterson pa a regale un ehemplar.
Den un entrevista cortico cu sr. Peterson, el a splica cu e buki ta consisti di diferente topico. Un di nan ta a tabel di e nombernan di nos parhanan na Papiamento, Ingles, Hulandes y Spaño banda di nan number cientifico. Den e tabel aki tin 254 tipo di parha cu ta haya na Aruba, e buki tin portret di 129 tipo di parha cu a wordo saca na Aruba. Sr. Peterson ta enfatisa cu tur portret den e buki a wordo saca na Aruba y e buki ta consisti di 432 pagina. E buki ta splica tambe cua ta e 16 areanan di importancia pa nos naturalesa na Aruba y con nan mester wordo protehi y bira parti di Parke Nacional Arikok.
Inspiracion/Motivacion
A puntra sr. Peterson kico a motiv’e pa bin cu un buki asinaki, el a bisa:“ Di un banda nos ta wak cu tin masha tiki publicacion di naturalesa na Aruba y falta masha hopi pa haci ainda. Di otro banda, Aruba ta perdiendo naturalesa masha lihe mes y e buki tey pa yuda mustra cu nos no tin cu laga tur cos na Aruba bay perdi. E buki tambe tey pa asisti nos maestronan di scol y tur amante di nos naturalesa”.
Teniendo na cuenta e proteccion di e parhanan a puntra sr. Peterson kico Aruba ta haciendo bon y kico por mehora, pa cual el a bisa cu Aruba ta ‘leu foi cas’ ora ta papia di proteccion di parha y nos naturalesa en general. “Nos tin un peticion aden cu 11 mil firma puntrando Gobierno di Aruba pa proteha 16 areanan y nos ta spera cu esaki lo sosede den e proximo un of dos luna. Tambe nos ta suplica pa e ley di medio ambiente wordo manda pa Parlamento y cu e listanan di flora y fauna cu mester wordo proteha, wordo efectua mas lihe cu ta posibel. Esaki lo ta algo hopi prestigioso pa nos pais si gobierno por materialisa esakinan.
Por ultimo, na 2012 nos Shoco a bira un Simbolo Nacional y na 2014 nos a acerca gobierno pa nombra nos Prikichi como Aruba su Parha Nacional. Nos Shoco y Prikichi ta “endemic” (regularmente di e area) di Aruba, y tur dos ta carga e number ‘Arubensis’ den nan number scientifico. Ta nos deber pa proteha nan, pero lamentablemente nan cantidad ta bahando. Door di proteha nan, nos lo por scapa nan di bai perdi. Nos ta spera cu Minister de Meza declara nos Prikichi nos Parha Nacional mas lihe cu ta posibel, sr. Peterson a termina bisando.