Debi na e normal nobo e nobena Nacional na honor di nos Patrona stima Santisima Virgen di Alto Vista lo no tuma lugar manera custumber na Kapel di Alto Vista, pero tur dia e lo ser ofrece den un parokia den e misa mes.
Dia 28 september e ta cuminsa na Parokia di Noord
Dia 29 september Parokia di Brazil lo ta na turno
Dia 30 di september, tambe fiesta di San Miguel, Parokia di Dakota ta na turno
Dia 1 di october Parokia di Tanki Leendert ta na turno
Dia 2 di october Parokia di Paradera ta na turno, sigui pa despues di misa cu adoracion Nacional
Dia 3 di october Parokia di Savaneta ta na turno
Dia 4 di october Parokia di San Nicolas ta na turno
Dia 5 di october Parokia di Santa Cruz ta na turno
Dia 6 di october Parokia di Oranjestad ta na turno
E ora di e nobena lo ser anuncia durante e misanan den e weekend aki den diferente parokianan.
Miembronan di e Comision Nacional, representando diferente parokianan ta ser pidi pa asisti nan Pastoor den organisacion di e nobena y tambe pa yuda cu e Virgen Peregrino lo ta presente durante e nobena den e respectivo Parokia.
Fielnan por sigui e nobena via virtual ariba facebook di e parokianan. Corda cu luna di october ta luna di Mama Maria y pa reza e Santo Rosario.
Ariba peticion di Vicario e Virgen Peregrino di Santisima Virgen Mama Maria di Alto Vista lo ta presente den e parokia durante e nobena.
Dia 7 di october e fiesta grandi, esta e fiesta di nos patrona Santisima Virgen Mama Maria di Alto Vista lo tuma lugar na kapel di Alto Vista mes y lo cuminsa pa 5:30’or di atardi. Cada parokia por asisti cu 10 fiel, manteniendo e reglanan di e normal nobo.
E misa di atardi aki fuera cu e ta e celebracion di e Patrona di nos pais, lo bira un Misa Nacional, na unda lo reza pa esnan cu a perde nan bida pa motibo di COVID-19 y tambe pa nos Patrona stima intercede y yuda nos y mundo pa pasa den e momentonan dificil historico cu nos pais ta pasando aden.
Gobernantenan ta mas cu bon bini, lo no bay tin invitacion oficial, nos ta un solo pueblo. Aruba y mundo mester di oracion y ta bon pa pueblo uni den oracion y sigui fielmente e Nobena dedica na nos Patrona stima.
Kapel di Alto Vista ta keda e sitio di oracion mas bishita pa nos hendenan y nos bishitantenan.
