For di 1 di november DVG y IBISA a cuminsa cu campaña di ‘Boost bo defensa’. Pa e tema di e siman aki ta drumimento suficiente pa asina yuda mantene e sistema inmuno fuerte. Sr. Fiderd Vis di DVG ta comparti e informacion mirando e temponan di Covid-19.
Cada tema cu nan ta bin cune ta bay den man pa asina e persona por tin un estilo di bida saludabel pa su mes y den caso cu e persona keda contagia cu e malesa. Sr. Vis ta bisa cu mucho biaha nos no ta pensa riba importancia di drumimento.
Un tip cu e ta duna ta cu mester inverti den unda nos ta drumi riba dje, manera un bon cama, bon cusinchi cu ta yuda lomba y tur cu un persona mester pa por drumi comodo. Tur esey mester tene na cuenta na dje, sin lubida e parti cu ta recomenda pa drumi 7 pa 8 ora pa dia.
Sr. Vis ta bisa cu tambe ta importante pa tin un rutina sea ora di bay drumi, te cu ora di lanta. Custuma e curpa cu ta su ora pa bay drumi, paga television, pone celular un banda of lesa un buki. Paga e lus pa asina e no strob’e ‘tin un rutina’.
Un otro punto cu sr. Vis ta menciona ta e parti cu ta recomenda pa powernap. E ta bisa studio ta bisa cu un 5 pa 20 minuut di powernap oranan di atardi, ta yuda pa drumi bon anochi.
Segun sr. Vis e beneficio pa drumi bon ta inmenso. “Mas ritmo bo tin, miho bo ta train. Corda cu ora bo ta drumi bo curpa ta release hormona. Ami manera un atleta olimpico y coach ta promove drumimento hopi”, e ta bisa.
Un factor cu e ta menciona ta e parti di drumimento ta bay den man cu training. Ora un persona haci ehercisio ta ora cu e kibra tehido anto ora di bay drumi, e ta repara esaki y recupera pa sigui yuda den e training, pa asina e tin un bon energia.
Sr. Vis ta bisa cu un persona cu no ta drumi bon, no ta productivo, e ta haya malbeis y cuminsa crea stress. “Stress ta cuminsa subi, pa tin stress ta natural pero si e bira cronico eynan e ta perhudica e salud”, e ta splica. Ta importante pa crea un rutina y tin un ‘shutdown time pa ora drumi’. Awo cu e temporada cu ta bibando aden esey ta importante.