Diabierna ultimo, aspirantnan di e estudio basico pa bira agente di Wardacosta (Basis Opleiding Kustwacht (BOK) 2023), a marcha drenta Marinebasis Parera despues di cuater siman di entrenamentu intensivo. E 21 aspirantnan di Aruba, Corsow y Sint Maarten, tin un meta, un carera bunita na Wardacosta.
Durante e simannan di introduccion e hobennan pa cuater siman largo, bow di guia di nan instructornan a sigui les den klas y bai diferente campamento introductorio. Durante e campamentunan, e aspirantnan a marcha basta kilometer, landa hopi, cushina nan mes, construi vlot y tambe a completa ehersisionan anfibio. Nan ehersisio final pa nan simannan di introduccion di ‘Samen Sterk’ a cuminsa diawebs ultimo parti anochi. Pa e ehersisio final aki e aspirantnan a marcha y a rema riba laman cu destino final Marinebasis Parera riba diabierne mainta. Na Marinebasis Parera e aspirantnan a keda risibi cu un aplouso caluroso na entrada di parti di coleganan di Wardacosta y otro coleganan.
Durante e ceremonia Director di Wardacosta Caribe Hulandes, Walter Hansen a hiba un discurso pa e aspirantnan y nan instructornan. “Bosonan a cuminsa e trayecto aki, 14 di augustus como 21 persona individual di cual 10 candidato di Aruba, 6 di Corsow i 5 di Sint Maarten. Awor, 4 siman despues, mi ta mira 1 grupo, 1 unidat! Wardacosta ta un profeshon bunita, importante,y honorabel. Bo ta bisti dos pechi: un di polis y un di marinero. Awor e otro parti di bosonan estudio ta cuminsa. Esaki ta solamente e fin di e prome fase. Tur kos ku bo siña awor, bo por huse den bo trabou den futuro. Awor bo tin e chens pa hasi fayonan y siña for di nan. Exito ta unicamente posibel si bo traha como tim. Hunto nos ta fuerte! Pabien!”
Despues di e discurso di e Director, e aspirantnan a risibi nan pechi ofisial di BOK, como muestra di aprecio pa nan prestacionnan durante e simannan di introduccion. E siman aki e aspirantnan ta bai cuminsa ku e modulo basico di habilidat, cu ta inclui prome ousilio (EHBO) y habilidatnan di tiru, cu lo bai dura 8 siman. Wardacosta ta desea e aspirantnan hopi exito.
