‘2021 lo ta duro pa turismo’: AHATA cu peticion urgente pa tuma accion riba reforma di ley laboral

AHATA recientemente a describi den un carta nan preocupacion y sentido di urgencia pa tuma accion y un update riba plan di reformanan pa Aruba. Nan ta menciona cu proyeccionnan pa recuperacion di turismo na 2021 ta indica cu lo tin un dificultad grandi pa tur compania cu ta depende di turismo como nan entrada.

Esaki ta e aña cu e pandemia lo tin su impacto di mas grandi riba e economia. Despues di e decision di CDC cu ta rekeri pa return-testing pa vuelonan pa Merca, e proyeccionnan a cuminsa wordo ahusta y rebaha. Esaki ta un indicacion di dificultadnan grandi pa loke ta recuperacion di nos turismo y economia segun AHATA. Mientras cu na 2020 hopi companianan ainda por a mantene nan mes cu sosten di gobierno y reserva, na 2021 reservanan a disparce y sosten lo por bira dificil.

AHATA ta para riba cu e sector priva mester di tools pa ofrece e posibilidad pa restructura of inova. Pa e economia crece, negoshinan mester keda na pia y sigui crece. Esaki ta rekeri tools cu a wordo pidi den pasado pa sector priva y cual ta pa gran parti den Aruba su Master Plan. Mas importante ainda, nan ta wordo refleha tambe den e condicionnan cu Hulanda a pone relata na e prestamonan.

Gobierno a publicamente bisa cu nan ta bay di acuerdo cu e metanan di e Landspakket y cu conhuntamente nos Master Plan lo por logra e reforma aki. Sinembargo, AHATA ta bisa di no ta mira un sentido di urgencia of progreso den inicia e reforma. “Si tin algun progreso, e ora ey no tin transparencia den e proceso,” AHATA ta indica.

“Nos ta realisa cu e proceso pa introduci leynan di Reino y COHO lo tuma tempo. Sinembargo, Aruba no por sinta keto y warda.”

2021 mester bira aña di accion
AHATA ta subraya cu 2021 mester bira un aña di accion, si gobierno brinda e tools necesario, sector priva por haci e plannan necesario y inova na un nivel mas halto di productividad y recuperacion. Mas cupo di empleo por wordo salba por medio di ofrece negoshinan oportunidadnan pa reorganias y transforma.

AHATA: “Nos ta haci un peticion urgente pa accion wordo tuma pa reforma, incluyendo reformanan laboral, y pa organisacionnan wordo inclui den e proceso di defini e detayes di e reforma. Ta di prioridad halto pa Aruba transforma na un mercado dinamico y productivo, pa un economia activo y asina crea un futuro mas fuerte.”

Comments

comments