20 mion euro pa Hulanda Karibense

Reino ta invertí 20 mion euro den Saba, Sint Eustatius i Boneiru. Asina ta duna un aporte na e fortifikashon deseá di e komunidat i prosperidat amplio riba e islanan. E invershon ta bin riba e 30 mion euro ku anteriormente ya a pone disponibel for di e Ènvelòp Regional. Konseho di Minister a bai di akuerdo awe ku esaki riba sugerensia di minister Carola Schouten (Agrikultura, Naturalesa i Kalidat di Kuminda) i minister Raymond Knops (Asuntunan Interno i Relashonnan den Reino).

Minister Schouten:”Hulanda Karibense ya kaba ta riba e bon kaminda pa oumentá e prosperidat amplio. Sèptèmber ku a pasa mi a bishitá Saba, Sint Eustatius i Boneiru. Aya mi tabata presente na komienso di un di e proyektonan di e ròndu anterior, e ‘Hydroponics Farm’ na Saba, i a mira ku mi mes wowonan e problemátika di eroshon na Sint Eustatius ku ta atendiendo ku sèn for di e Ènvelòp Regional. Ku e impulso nobo aki e islanan por sigui ku e bon plannan i ambishonnan ku ta yuda trese e region mas leu. I esei ta loke e gabinete ta boga p’e ku ‘Regio Deals’.”

Minister Knops:”E kontinuashon di un aporte pa Hulanda Karibense for di e Ènvelòp Regional ta asentuá e importansia ku hinter e gabinete ta atribuí na e rekonosementu i atendementu di e retonan ku Boneiru, Saba i Sint Eustatius tin nan dilanti.”

Ku e invershon aki sinku proyekto na Saba, Sint Eustatius i Boneiru ta haña un empuhe for di Reino. Un di e proyektonan ta dirigí su mes riba e kombatimentu di empeoramentu mas aleu di e refnan di koral. Ref di koral tin un ròl ekonómiko i ekológiko hopi grandi na Hulanda Karibense. Pa protehá i rekuperá e ref di koral a kompilá un plan di rekuperashon di koral ku ta enfoká riba e mehorashon di e kalidat di awa di kosta i plantamentu di koral. Na Boneiru ta bini un lokèt kaminda habitante por akudí pa informashon tokante di trabou i empleo. Dor di esaki oportunidat di trabou ta bira mas grandi i tin un punto di informashon pa buskadó di trabou, trahadó i dunadó di trabou.

Bon bibienda ta di importansia pa akohida di mucha bon di kalidat. P’esei gabinete ta pone 8 mion euro disponibel pa proyektonan ku ta mehorá e bibiendanan di akohida pa mucha i akohida despues di skol na Boneiru, Sint Eustatius i Saba.

Sosiedat finansiero
Pa mehorá e kalidat di bida i pa amplia prosperidat, gabinete ta invertí den desaroyo sosial-ekonómiko na Hulanda Karibense ku rekursonan for di e Ènvelòp Regional. Anteriormente e gabinete a pone 30 mion euro for di Ènvelòp Regional disponibel pa Saba, Sint Eustatius i Boneiru. E proyektonan aki entre otro ta hasi Saba i Sint Eustatius mas resistente kontra orkan i mas seif. Na Boneiru e proyektonan ta enfoká riba fortifikashon di merkado laboral i bibienda sosial.

Comments

comments