Diaranson a tuma luga e caso di e asesino di Lalo Webb, caminda cu hues a sentencie na 20 aña cera, apesar cu fiscal a pidi 22 aña mirando e hecho cu e tabata intencional.
Den e caso aki a sali na cla cu e victima, esta Lalo Webb, tabata tin contacto cu e sospechoso, na momento cu dos dia prome nan a topa pa e compra di un arma di candela na balor di 5 mil florin. E victima tabata tin sospecho cu varios tabata esnan cu kier a mat’e. Un tal BR y su gang tabata un di esnan cu tabata kier a mira Lalo morto. Ruman di e sospechoso tabata esun cu a planea e contacto pa e compra di e arma di candela. R. mes a nenga di duna declaracion. Conclusion cu por a saca afo ta cu e sospechoso a mata Webb riba orden di R. Esaki a conclui a base di yamadanan telefonico entre R. y e sospechoso JH, unda e ta bisa: “Si, mi ta cla!”. Esaki a wordo haci via telefon cu e co-sospechoso P.
Tin sospechoso, basa riba e yamadanan telefonico di dia 21 di Maart, 2015, cu lo tabata trahando riba un plan pa mata un otro persona. Pero H. ta nenga di ta conoce R. Hues ta haya cu e ta un menasa pa sociedad. Deliberadamente a bay topa cu Webb pa likid’e. Un punto importante cu a haya den e caso aki en contra di JH, ta cu nan a haya su DNA riba e victima. Y tambe a keda comproba cu e telefon di e sospechoso tabata den vecindario unda nan a haya e curpa di e victima, segun e cercania di e cellsitenan.
Hues ta haya cu asesinato ta un delito hopi serio y cu pa esey tin un castigo maximo di 30 aña. Bao di pretension falso, a palabra pa mata Webb y tur esaki cu metanan financiero. Pesey e sospechoso ta keda condena na 20 aña di prizon, incondicionalmente. Tambe ta haya e demanda di famia pa 12 mil florin ta admisibel.
Si H. no cumpli, e lo sinta 95 dia extra.