Dialuna mainta Hues di Corte den Prome Instancia a dicta sentencia den e caso penal cu Ministerio Publico a cuminsa contra e homber Curasoleño E.G.B.(52). Luna pasa tratamento di e caso a tuma lugar caminda Fiscal a haya Balyn. culpabel di tabata prepara transporte di lote di cocaina pa Hulanda. Fiscal a exigi 4 aña di prison.
MAS NOTICIA por a compronde cu B. tabata percura pa e lote di cocaina bay scondi den un cargamento di flor cu ta bin for di Colombia pa bay Hulanda.
FISCAL A EXIGI 4 AÑA DI PRIZON
Durante tratamento di e caso luna pasa, Fiscal a menciona cu tin varios casonan di traficacion caminda a scucha yamadanan. Investigacion ta mustra cu na December 2020, B. a cuminsa prepara pa transporta cocaina pa Aruba. E preparacion ta, cu mester hinca e kilonan di cocaina, den un cargamento di flor cu ta bin for di Colombia y ta destina pa Hulanda. B. mester hinca JPS den bloki di cocaina pa asina na Hulanda, esnan encarga por haya e droga. Fiscal a bisa cu nan a papia di pago di personanan envolvi na Aruba. Na Aruba B. a manda potret di e blokinan di cocaina. El a haya placa di blokinan di droga. B. a admiti di traficacion di blokinan di cocaina. Na December 2020 tabata papia di 10 kilo di cocaina. Na Februari 2021 tabata papia di 10 kilo di cocaina. E tabata manda potret di e bloki den cual el a hinca e JPS. Tambe e tabata manda potret di e cantidad di blokinan. Fiscal a bisa cu e ta haya legalmente proba cu na December 2020 tabatin 1 bloki so y na Februari 2021 tabatin 7 bloki. Fiscal ta haya cu B. ta forma parti di un organisacion criminal. Tabatin cantidad di mensahenan riba celular caminda B. tabata un persona importante den e organisacion criminal cu tabata dedica den traficacion di droga. Fiscal ta haya cu B. tabata den un organisacion profesional y tabatin un funcion importante. Na opinion di Fiscal, mester manda señal bon cla cu no ta accepta tipo di actividadnan asina. Fiscal ta haya cu B. a envolvi su mes den un organisacion pa gana placa y no a worry cu e consecuencia cu esaki por tin pa comunidad. Fiscal a exigi 4 aña di prizon, kitando e tempo cu e ta sera. Fiscal a bisa pa debolbe e I Phone cu a confisca di B.
ABOGADO
Abogado mr. Mohamed a bisa Hues cu B. ta wordo acusa di preparacion di traficacion di cocaina pa Hulanda, posesion di cocaina y forma parti di organisacion criminal. E abogado a bisa Hues cu na December 2020 y Februari 202, B. a prepara pa manda droga pero esakinan no a sigui. E ta laga na Hues pa dicidi riba e preparacion. E abogado a menciona un sentencia di Corte. Tambe el a menciona sentencia di 2023 relaciona cu cocaina, caminda el a mustra cu mester determina cu ta cocaina. Polis no a haya nada, no tin test di laboratorio cu ta mustra cu e bloki ta realmente cocaina. B. no a test e blokinan si nan ta realmente cocaina. E abogado ta haya cu no por prueba cu B. tabatin cocaina den su man y ta haya cu mester declar’e liber. E abogado a menciona sentencia di un caso na Hulanda riba organisacion criminal. E ta haya cu tur dos transporte no a sigui. E ta di opinion cu esaki no ta suficiente pa papia di un organizacion criminal. Despues di Februari 2021, no a sosode nada mas. Na opinion di mr. Mohamed, no tabatin un temporada largo di cooperacion manera ley ta exigi pa por papia di un organisacion criminal. El a menciona un caso di traficacion di 2019 di 10 kilo di cocaina, caminda a condena e acusado na 8 luna di prizon pa participa den organisacion criminal. E ta haya e castigo exigi pa Fiscal ta exagera.
SENTENCIA
Awe mainta, Hues a bisa cu a keda legalmente proba cu B. a prepara transporte di droga. Tambe Hues ta haya proba posesion di cocaina. Hues a bisa cu esey ta a base di whatsapp y potret cu B. tabatin algun bloki di cocaina. Tambe tabata papia di prijsnan cu a paga. Tambe a pone JPS den blokinan. Hues ta haya cu B. tabata forma parti di un organisacion criminal y cu B. tabatin un funcion importante. E droganan tabata wordo hinca den cargamentonan di flor cu ta destina pa Hulanda. B. tabatin contacto na aeropuerto. Hues no a sigui Fiscal su exigencia sino a baha esaki. Hues a condena B. na 2 aña y 10 luna di prizon kitando e tempo cu e ta cera den KIA. Hues a ordena pa e celular I Phone wordo duna bek na B.
