16,800 asiento adicional for di mercado Norte-Americano pa temporada di Winter 2016-2017

Aruba Airport Authority N.V. (AAA) ta satisfecho cu e pronostico pa e temporada Winter 2016-2017, mirando cu e pronostico ta mustra cu un total di 16,800 asiento adicional lo ta disponibel for di e region Norte-Americano.
Demanda fuerte di pasahero ta continua, mirando cu e pronostico di Aeropuerto di Aruba ta mustra un aumento di 4% door di e carriernan Norte-Americano.
E desaroyonan di servicio aereo cu ta wordo spera ta:
American Airlines lo bolbe cuminsa desde prome di September, 2016 cu su tercer servicio diario Aruba – Miami. E servicio adicional aki no ta solamente sirbi e region di Miami, pero principalmente ta sirbi e mercadonan secundario cu por ehempel ta contecta e region west cu Aruba.
JetBlue lo añadi 2 buelo diario adicional for di Boston y New York (JFK). Cuminsando for di 31 di October, 2016 te cu prome di April, 2017 e aerolinea lo ofrece un servicio adicional riba diasabra for di Boston. E aerolinea a añadi un servicio adicional riba diahuebs for di New York tambe pa e periodo di 4 di Januari pa 15 di Februrari, 2017. Pa ambos frecuencia adicional lo usa JetBlue su avion mas nobo, e A321 premium Mint experience.
Delta Airlines a agrega capacidad significante pa e temporada na caminda – poniendo 140 asiento semanal adicional riba e ruta Atlanta – Aruba door di haci cambio di avion B737-900 pa B767- 400. E avion “wide body” lo opera entre December 17, 2016 pa Maart 25, 2017, significando un aumento di 12% den e portfolio di Delta pa Aruba.
United Airlines a haci varios ahuste di network tambe door di agrega un capacidad significante di 12% for di Newark cu ta un combinacion di servicio semanal adicional y avion mas grandi durante dianan “peak”.
E mercado Canades tambe lo crece cu 24%, traduciendo den 5,665 asiento adicional pa e temporada y 25 buelo adicional pa e temporada di winter.
E ekipo di aeropuerto ta cla pa e temporada di Winter cu ta na caminda:“Aeropuerto constantemente ta traha riba e mehoracion di eficiencia y servicio na e cantidad di pasahero cu ta keda aumenta. Cu cada pronostico nos ta convenci cu nos esfuersonan pa sigui desaroya y expande e facilidad di aeropuerto tin un tiki urgencia” asina Sr. James Fazio, CEO di AAA a bisa. Nos inversionnan recien den automatisacion di procesonan pa procesa pasahero tabatin un impacto positivo riba e eficiencia na aeropuerto. Pasaheronan awo ta yega mas liher na gate y tin amplio tempo pa relaha y disfruta di e diferente opcionnan pa haci compras y come. Na final di 2016 nos lo por ofrece mas opcion di cuminda y bebida cu lo cumpli cu e deseonan di e cantidad creciente di pasaheronan. Nos ta ansioso pa yama bonbini na tur e pasaheronan cu lo bishita aeropuerto durante e temporada druk di winter na caminda.”

Comments

comments