Un otro weekend exitoso unda boluntarismo a briya riba nos isla, mustrando e curason grandi di nos comunidad unda 3,500 boluntario a bini hunto pa brinda sosten na 160 proyecto.
Diabierna mainta trempan a marca inicio di un otro edicion exitoso di Aruba Doet, cu presencia di Gobernador Interino Sr. Agustin Vrolijk, e organisadornan di Aruba Doet, prensa, y boluntarionan di Grupo Scout Sonrisa, un grupo di scouting pa personanan cu limitacion intelectual y/of fisico na Aruba.
Director di CEDE ARUBA, Daniel Tecklenborg, a resalta e di 13 edicion di Aruba Doet, un iniciativa conhuntamente cu Oranje Fonds, presente tambe na Corsou, Boneiro, Saba, Statia y Sint Maarten. E la enfatisa e importancia di boluntarionan como curason di nos comunidad y a duna gradicimento na tur boluntario, organisacion participante y Oranje Fonds pa nan dedicacion continuo na e iniciativa, demostrando cu Aruba Doet a bin pa keda.
Gobernador Interino Sr. Agustin Vrolijk, a enfatisa e balor di Aruba Doet y e rol crucial di trabou boluntario pa e bienestar di nos comunidad, remarcando cu ta un dia special pa tur boluntario cu tin e oportunidad pa traha pa nan comunidad y a expresa su gratitud pa por ta parti di esaki. E la haci un apelacion un biaha mas pa tur hende registra, indicando cu tin trabou pa tur hende, y mas boluntario tin, mas bon trabou por wordo haci, y mas completo e comunidad di Aruba lo ta.
E coordinadora di Aruba Doet, Paulien ter Meulen, tambe a tuma e oportunidad pa gradici tur boluntario, organisacion, coordinador, companianan y team di Aruba Doet pa haci tur esaki posibel.
E proyecto a wordo habri oficialmente cu e Gobernador Interino y Doeti poniendo e prome capanan di verf riba e speeltuin hunto cu su coleganan, pa asina yuda embeyece y renoba e speeltuin pa e mucha nan di Grupo Scout Sonrisa. E proyecto na Grupo Scout Sonrisa ta un di e hopi proyectonan bunita cu a tuma lugar durante e fin di siman aki.
Aruba Doet ta gradici di curason tur cu a forma parti di e di 13 edicion, y ta spera cu e bon trabou boluntario por continua durante henter aña. Preparacion a cuminsa caba pa otro aña, y ta conta riba boso sosten atrobe!
