Un total di 10 mil persona a presencia e tres dia di explosion di Arte den cayanan di San Nicolas.
Artistanan specialisa den musica, baile, arte contemporaneo, arte plastico, arte visual, declamacion y tur otro disciplina di arte a entretene e multitud presente den un ambiente cu sigur tabata uno festivo, pa prome bez organiza na Aruba.
E comunidad Artistico di Aruba a responde den un forma excepcional y por a gosa di entre otro e fenomenal artista Gloria Vega dunando un homenahe na e artista muralista Internacional di Colombia Guache. Pero tambe di e sensacional Alydia Wever cu su presentacionan a sa di emociona mas di un cu tabata presente.
E edificio di The Old Barbershop di Rietveld Academy of Fine Arts a luci obranan unico, tresi dilanti pa e hobennan cu apenas a inicia nan aňa escolar. Di un forma masha cordial e studiantenan a sa di yuda e organisacion pa pone tur e canvas di 2×3 meter traha pa studiantenan di diferente scolnan na nan luga di exposicion, demostrando asina cu Arte ta union. E obra artistico di e scolnan a luci masha.
Atelier’s 89 den e edificio di Duane a transforma e edificio cu arte di entre otro artistanan manera entre otro Desiree Sporkslede, Egmar Irausquin, Ryan Oduber y asina proyecta e posibilidad di bin cu un museo contemporaneo muy pronto na San Nicolas.
E artista fascinante Osayra Muyale cu Espacio Blauw, ongoing project Paradise Park 2013 a sa di acapara masha hopi atencion.
E edificio di Aruba Art Fair cu ta yama ArtisA a keda impresionante gracias na e toque di Luis Gomez & Co., cu tabata e curator pa e feria aki.
Proyeccionan di Video, galeria urbano, obranan artistico di Aloe, Korte Weg, workshopnan den e edificio di Cosecha, cuminda y musica y e galeria humano, na unda baile poesia y canto a ser treci dilanti. Un Danki special na John Freddy Montoya y Natusha Croes hunto cu musicante Caleto cu a percura pa esaki bira un realidad.
E obra JUWANA, di Bordalo II, banda di Biblioteca Nacional a fungi como e perfecto acabado pa un potret di famia. Y ta di lamenta cu na ultimo momento Cuba’s Cooking no por tabata presente,
Diadomingo e bishitantenan por a presencia e intervencion urbano gigantesco treci dilanti pa Isidora Paz di Chile hunto cu Omaira Silva y ayudante Mike Geerman di Shoco Garden, cu ta representa un bailarina di Carnaval “Mariposa Unica”. Un Trabao grandi den varios piesa di 3D cu a hiba oranan di trabao. Nos artistanan local merece tur elogio di a traha incansablemente te den oranan di mainta pa termina e bunita presentacion cu awor por woro mira na e muraya den caya principal. Un acabado y sincronisacion cu e bankinan precioso tresi pa nos voluntarionan amante di mozaik.
Aruba Art Fair ta yama Danki na tur esunnan cu a confia den e iniciativa di trese Arte pa Aruba di un manera diferente. Y Danki na Aruba cu a responde, elogia y respalda nos artistanan local.
Mas cu claro Aruba Art fair no por tabata posibel sin e sosten di Ministerio di Cultura y Minister Otmar Oduber, Aruba Tourism Authorities, TPEF, Departamento di Cultura, UNOCA. AAA, CMB, AIB, PWC, Sjiem Fat Laywers, AIS, Ecotech, Superfood. Hotel partners Renaissance Resorts , Divi Divi Resorts y La Cabana Beach & Racquet Club. Na cuerpo Policial y Brandweer Aruba masha Danki. Bishita www.arubaartfair.com .pa mas potretnan y video. Te otro aňa cu Dios su poder.