Dialuna 15 di april ta ultimo dia pa entrega nominadonan pa Copa Hubenil Gobernador Felipe B. Tromp.
Kendenan por bini na remarka pa nominacion? Un hoben of grupo hubenil cu a destaca durante e ultimo aña sea ariba tereno social, deportivo of cultural por ser nomina door di un mayor, maestro di scol, organisacion hubenil social, cultural of deportivo. E edad ta di seis pa binti aña.
Aruba ta conoce cu un gran cantidad di hoben cu ta dedica nan tempo liber riba tereno di deporte, cultura y proyectonan social bou guia di adultonan. E lidernan aki hopi biaha ta yuda e hobennan den nan formacion a base boluntario. Sin duda esaki ta di aprecia cu nan como adulto ta pone nan tempo disponibel pa yuda forma hobennan ehemplar den nos comunidad.
E logro di e hoben of hobennan por ta a base di premionan gana localmente y den exterior durante e periodo di 1 di april 2018 pa 31 di maart 2019. Otro puntonan cu e hurado ta husga ta proyectonan sea pa formacion di e propio miembronan of proyectonan realisa pa comunidad.
Nos conoce scolnan, instancianan caricativo, gruponan religioso, coronan etc cu ta haci hopi trabou social pa hubentud y pa comunidad.
Por manda tur nominacion acompaña pa potret of recorte di corant pa e siguiente personanan: [email protected], [email protected], [email protected] , prome cu dialuna 15 di april 2019.
E entrega di premio lo tuma luga dia 27 di april, Dia di Rey den Wilhelmina Park door di Su Excelencia Gobernador di Aruba.