Internacional – Farandula: Michael Joseph Jackson a nace dia 29 di Augustus 1958. E tabata un cantante, compositor, bailarin y filantropo americano.
Jackson ta wordo considera como un di e artistanan di mas grandi y cu mas influencia den historia. Su contribucion na musica, baile y moda pa mas cu 4 decada hunto cu su bida personal a haci’e un figura global popular. E la influencia artistanan rond di mundo di varios genero di musica. Door di su presentacionnan riba escenario y den su videoclipnan e la popularisa bailenan complica manera moonwalk y the robot.
Jackson ta e persona cu tin mas premio como artista individual den historia. Debi na su influencia y fama e ta conoci como e REY DI POP.
Riba un 25 di Juni 2009 pa 2.25 di atardi na Ronald Reagan UCLA Medical Center e la wordo declara morto. Ta wordo bisa cu e lo a haña un atake di curason. E tabata tin 50 aña di edad.
Ora e noticia a sali hopi hende a kere cu tabata un rumor y e noticia a bula manera polvo. Henter mundo a manifesta nan interes pa sa si e noticia aki ta berdad. Su morto a duna Google, Twitter, Facbook y Yahoo e “views” di mas halto ever registra.
Dia di entiero e caha di morto traha specialmente pe cu a costa un kwart millon di dollar yama ” Promethean” a wordo exhibi na e servicio pero e caha nunca a wordo habri. Mas cu 3 mil polis a wordo asigna pa traha e dia ey. Esun di mas grandi despues di e weganan di Summer Olympics na 1984 y a costa e ciudad di Los Angeles 1.4 billon di dollar.
Apersar cu e la fayece na 2009, keto bai e ta keda den noticia y su musica ainda ta popular.