Awe mainta a tuma luga ceremonia na Scol di Polis situa riba Fortheuvelstraat. Aki ta caminda cu 14 polis a ricibi certificado di Basis Certificaat, pues cumplimento di e prome dos añanan di Scol di Polis. E dos añanan cu falta pa completa e opleiding completo, lo ta combina cu tanto trahamento y studia.
Pues e polisnan lo ta activo riba caya pero tambe bezig cu scol. Irma Gordon ta alto comisario interino, durante un entrevista exclusivo cu MasNoticia.com el a manda un mensahe di exito na e polisnan cu ta cla pa sirbi nan pais riba caya. “Sea bo mes y sea consciente y respeta”, asina Gordon a duna di conoce awe mainta durante e ceremonia na Scol di Polis.
Jeanette Richardson – Baars ta hefe na Scol di Polis, e tambe tabata presente na e momento special aki. Baars a conta cu e parti di certificacion y diploma ta parti den dos dia.
Awe 14 hoben a ricibi nan certificado pa cumpli mita di nan trayecto na Scol di Polis mientras cu mayan 30 studiante cu lo ricibi nan diploma. Pues e 14 studiantenan di awe ta di Klas 2019 mientras cu e 30 di mayan ta di Klas 2017. Pa locual ta Scol di Polis mes, desde 1 di october lo habri un klas nobo pa tur cu ta interesa. E parti di solicitud por subi e pagina di Polis y mira lista completo di exigencia cu nan ta pidi.