Na 1991 International Diabetes Federation’ (IDF) a cuminsa cu un dia specialmente dedica na Diabetes. Esaki a bira dia 14 di November y tur aña e fecha aki ta wordo uza como un dia di conscientisacion globalmente riba ‘Diabetes Mellitus’. Na 2006 e Organisacion Mundial di Salud a haci’e un dia di Nacionnan Uni. ‘Diabetes Mellitus’ ta conoci aki na Aruba como malesa di sucu.
E tema scogi pa Dia Mundial di Diabetes 2016 ta “Wowo riba Diabetes”. Tur actividad y material di e aña aki lo pone enfasis riba e importancia di ‘screening’ pa diagnostica diabetes tipo 2 tempran. Un diagnostico na tempo ta importante pa motibo cu asina un pashent por cuminsa cu su tratamento y ta reduci tur riesgo pa complicacionnan serio.
Apart di tur consecuencia di diabetes mes como malesa, e por causa tambe problema di bista te yega na ceguedad. Otro malesanan ta malesa cardiovascular, insuficiencia di riñon y hasta amputacion. Diabetes ta e di dos causa di morto den mayoria pais di Latino America y di cuater causa di morto na Estados Unidos. For di aña 1980 pa 2016 e cantidad di persona cu tin diabetes a bira 4 biaha mas hopi, esta 422 miyon adulto. Den e proximo 20 aña e cantidad por bira dobel mas hopi.
Actualmente na Aruba 8.035 persona ta hayando tratamento pa diabetes y mayoria di nan ta persona entre 50 pa 70 aña. Na aña 2015, remedi cu ta wordo uza specificamente pa diabetes a costa AZV un total di Afl. 4.013.800,- . Un 20% di e poblacion di Aruba tin diabetes y/of malesa di curason y esaki ta responsabel pa 59% di e gastonan di cuido. (Afl. 193.201.679,- na aña 2015).
1 di cada 2 adulto cu tin diabetes no ta diagnostica. Den mayoria di e casonan aki ta trata di diabetes tipo 2. Hopi di e hendenan cu no ta diagnostica ya caba tin complicacionnan manera; malesa di wowo, malesa di curason y ader, malesa di riñon of malesa di e nervionan.
Actua awe pa cambia mañan! Tene cuenta cu posibel sintomanan di diabetes manera; sed excesivo, baha peso, urina frecuentemente, falta di energia y/of vision malo.
Den e simannan aki e Bus di Salud ta haci chekeonan di salud cu enfasis riba diabetes gratis! Lo tin extra atencion pa cuido di wowo door di midi presion di wowo den bus.
E datonan di Aruba a wordo añadi door di Plataforma Promocion di Salud. E plataforma ta un iniciativa di Minister di Salud y ta traha pa canalisa informacion di salud pa e poblacion di Aruba y tambe na e dunado di cuido den salud. E siguiente organisacionnan ta forma parti di Plataforma Promocion di Salud: Departamento di Salud Publico (DESPA), SVB, Wit Gele Kruis, IMSAN, dr. Horacio Oduber Hospital y Instituto Biba Saludabel y Activo (IBiSA).
Awe dialuna 14 di November 2016 ta Dia Mundial di Diabetes (World Diabetes Day).
Social media spots:
(bron: http://www.idf.org/prevention)
Bo tabata sa cu 30 minuut di ehercicio pa dia por reduci e riesgo pa desaroya diabetes tipo 2 cu 40%?!
Obesidad, en particular obesidad abdominal, tin un link cu e desaroyo di diabetes tipo 2. Baha di peso por mehora e resistencia di insulina y por reduce e presion. Pa e rason aki nos ta curasha cu ta sobre peso of obeso pa logra of mantene un peso saludabel
Wowo riba diabetes?
1 di 2 adulto cu diabetes no ta diagnostica
Hopi hende cu no ta diagnostica cu diabetes tipo 2 ya caba tin complicacionnan
Screening pa diabetes tipo 2 ta importante pa sigura un diagnosis y tratamento na tempo