IMBABURA, Ecuador – Por lo menos 13 persona a fayece y 28 a resulta herida, ora cu un autobus di e transporte publico a bolter, den e provincia Andina di Imbabura, nort di Ecuador.
E fuente di sistema di Vigilancia ECU911, a precisa cu e socoristanan ainda ta realisando tareanan di rescate den e zona, ya cu por tin otro hende atrapa den e vehiculo, cu tabata cubri e ruta entre e ciudadnan di Quito y Ibarra. E autobus a bolter riba e via Panamericana, den e zona di Otavalo.
Segun un informe preliminar di e socoristanan, e autobus interprovincial di pasahero “lo a perde caminda provocando asina e boltermento.”
E autobus, di e cooperativa San Gabriel tabata hibando mas of menos 40 persona, entre nan varios menor di edad, uno di cual di aproximadamente dos aña, a fayece pa motibo di e impacto.
Ta trata di e di dos accidente di e tipo aki pa loke ta trata e luna, despues cu otro autobus a bolter dia 14 ultimo, den un zona costera, den un accidente cu a costa bida di un persona y caminda cu 11 a resulta herida. Otro tres persona a fayece y 26 a resulta herida ora cu un otro autobus di transporte publico a bolter den e provincia di Manabi, west di Ecuador, dia 7 di Augustus.
E accidentenan di autobus ta un fenomeno preocupante na Ecuador. Na Juli ultimo a keda registra dos suceso similar, un di nan cu 14 persona fayeci y 26 hetrida riba un caminda cu ta uni e provincianan di Pichincha y Santo Domingo de los Tsachilas (centro-nort di e pais).
Fuente: www.infobae.com