MANIZALES, Colombia – Deslisamentonan ta sigui debi na e temporada di awasero cu Colombia ta bibando aden. Durante e anochi di diamars, a registra un fuerte awasero na e ciudad di Manizales cu a provoca varios deslisamento, vooral caminda cu e reportenan a indica cu tin 13 persona morto, 20 desapareci y nuebe herida. Ademas tin informe di 59 vivienda afecta, mescos cu 12 caminda perhudica.
E sectornan afecta pa deslisamentonan ta Aranjuez, Camilo Torres y Bajo Persia.
Den e ultimo aki, ta realisando operacionnan di buskeda y rescate di persona y ta apoyando e desaloho preventivo di viviendanan. Tambe a registra incidentenan den e bario San Ignacio y Alto Acstilla.
Tambe, e awasero a provoca cu varios rooi cu ta atravesa e ciudad a desborda y a provoca inundacion den varios zona di Manizales, entre nan den e edificionan di e bario Villapilar y e via ubica tras di e centro comercial Fundadores.
E alcalde di Manizales, Jose Octavio Cardona, a activa e plan di emergencia pa e inundacion den e ciudad. Tambe a ordena suspende e hornada escolar ya cu varios caminda a wordo afecta.
Tanto den e caminda Panamericano como esunnan cu ta dirigi na e sectornan di La Linda y Chipre, ta registra desprendimento di e capa vegetal. Tambe, otro deslisamento di tera tin e Puente Olivares blokia y e via pa e municipio di Neira.
Tambe a ordena e desalho di Aranjuez y Gonzalez, den e ultimo bario aki, a registra otro deslisamento rond di 6’or y 45 di mainta. Ademas, e ciudadanonan a indica cu e sero ta sigui tin movimento y cu por tin fuga di gas.
Christian Euscategui, hefe di e Servicio di Pronostico y Alerta di e Instituto di Hidrologia, Meteorologia y Estudionan Ambiental (Ideam), a indica na Caracol Radio, cu ta spera awasero fuerte den henter e pais den e proximo 48 oranan.
Autoridadnan a recomenda e comunidad pa sigura cu e canal di e viviendanan, sumidero y rioolnan keda liber di sushedad pa e awa sigui core cu normalidad.
Fuente: El Espectador