Awe den corte a wordo trata un caso hopi dificil cu a cuminsa 8:30 di mainta y te cu merdia tabata bezig ainda relaciona cu un padrastro y mama cu ta acusa di abusa di dos mucha menor di edad. Abogado Demis Illes ta splica cu e caso ta bastante pisa, bo ta ripara esaki tambe segun e na e demanda di fiscal [8 y 6 aña] kiermen no ta nada cu ta wordo tuma como algo ‘light’ segun Illes. “Nos a trece dilanti kico ta e punto di bista di e cliente, e cliente semper a para ariba y ta nenga e acusacion, y esey ta con ta sigui hiba e caso.”
E ta un caso bastante dificil segun e abogado a expresa, e ta tuma su tempo, Hues mes a tuma tur su tres siman riba dje, y riba 12 di februari lo tin sentencia. Acusacion pa tur dos ta: pa loke ta e homber ta tres cargo di rape y imoralidad cu muchanan, pa e mama tambe mescos pero den forma di complice.
E caso aki ta trata di un pareha cu a abusa di menornan di edad pa por lo menos 1 aña, unda cu e mama a para complice di violacion di e menornan, segun a bin dilanti den corte.
Segun informacion, e muchanan semper a biba cu nan wela cu ta stima nan un mundo y ta saca cara pa nan. E abuso a cuminsa ora cu e mama a pidi pa e muchanan bay biba cu ne y su pareha, e muchanan no por a wanta e abuso anto a basha abao. E muchanan a bay cerca nan wela y no tabata kier a regresa mas cerca e pareha, bisando nan wela tur cos, e pareha a wordo despues denuncia na husticia.