For di Diaanson te diasabra ultimo, un total di 116 socionan Latino Americano tabata na Aruba pa participa na e di 28 Conferencia Anual di Turismo di Aruba (CATA). Meta di e reunionnan aki tabata pa introduci Aruba na nan y pa e socionan existente, pa actualisa nan riba loke nos isla tin pa ofrece como destino, ademas di genera contacto entre e diferente entidadnan turistico y di negoshi riba nos isla.
E participantenan ta inclui operadornan cu ta bende Aruba, aerolinea, socionan di sector hotelero, pero tambe Aruba ta probecha pa invita prensa selecta pa asina cubri e evento. E programa di CATA a inclui conferencianan, bishitanan na hotel, oportunidadnan pa intercambia idea y negocia cu tur e dunadonan di servicio na Aruba. E conferencia aki ta uno hopi importante pa turismo di Aruba y ta parti di e strategia di diversificacion di A.T.A.
Minister Ing. Mike de Meza ta masha orguyoso di e esfuersonan di ATA y e socionan den turismo, relaciona cu e evento aki. El a desea tur e participantenan hopi exito na inicio y como tal a keda contento cu tur e logronan y relacionnan cu a forma durante CATA 2017, cu e compromiso cu nan lo trece hopi turista mas pa Aruba den e tempo venidero.