1 di febrüari 2021 Warda Costa a celebra su di 25 aniversario. Durante un ceremonia simpel, pa motibo di e medidanan di COVID-19, a conmemora e hecho aki hunto cu personal di Warda Costa y un grupo chikito di invitado na e puntonan di sosten di Warda Costa na Corsou, Aruba, St. Maarten y na Hato. E Director di Warda Costa, Frank Boots a duna un speach durante di e ceremonia caminda e la refleha bek riba e historia di e organisacion, e futuro di e organisacion y tambe su aprecio pa e trahadornan di e organisacion unico aki den Caribe.
Na aña 1993 a start ku e idea pa un Warda Costa den Caribe caminda a pone e prome ‘piedranan’ pa por cuminsa forma e organisacion. A dura te cu december 1995, na momento cu a firma e ‘Voorlopige regeling van de instelling van de Kustwacht’ cual tabata e documento oficial prome cu e ‘Rijkswet Kustwacht’ cu ta vigente actualmente. E fecha oficial cu finalmente a establece e organisacion cu tabata yama na e momento ey ’de Kustwacht voor de Nederlandse Antillen en Aruba’ a bira 1 febrüari 1996. E ‘Rijksministerraad’ na Hulanda a bay di acuerdo na 1995 pa integra e unidadnan di Defensa y pone nan na disposicion di Warda Costa. Te cu awe e unidadnan di Defensa y personal di Defensa ta integra den e organisacion. E personal di Defensa ta traha conhuntamente cu e personal local cualnan ta personal civil hunto cu e propio unidadnan di Warda Costa. Apesar di e diferencianan den e organisacion, Warda Costa ta funciona como un organisacion y ta actua como un organisacion hudicial riba e islanan.
E aña akí, e aña di e 25 aniversario ta marca e comienso di un era nobo pa e organisacion di Warda Costa. Un aña cu cambionan intensivo cu lo nifica un cresemento pa e organisacion cual lo ser realisa danki na e sosten financiero di Hulanda. Como tal, Warda Costa lo por funciona mas eficiente pa hunto cu su partnernan den e cadena hudicial proteha e frontera di e islanan.
Na final di e speach di e Director di Warda Costa, cual a ser transmiti via di un ‘livestream’ pa e puntonan di sosten, tabata momento pa corta e bolo di e 25 aniversario di Warda Costa. E personal y e grupo chikito di invitado presente por a gosa di un pida bolo y un bebida pa celebra e dia memorabel aki. Henter aña 2021 lo ta un aña festivo pa e organisacion, teniendo cuenta cu e medidanan vigente di COVID-19, den cual lo celebra cu tur e personal, e ‘stakeholdersnan’, e partnernan den e cadena hudicial y cu e comunidad. Esaki como muestra di aprecio y danki na e sosten duna na Warda Costa den e ultimo 25 añanan.