POTSDAM, Alemania – Un estudio divulga pa e revista Nature Climate Change, a compara dos periodo di tempo entre cual e temperatura medio a aumenta, derivando den e intensificacion di temporadanan di calor y awasero torencial.
E hecho cu e temperatura media ta hisa “solamente” cu mey grado Celsius ta basta pa e multiplica y intensifica e periodonan caluroso y awasero torencial den e ultimo añanan aki den varios region di mundo, segun un estudio publica diabierna.
Investigadornan a compara dos periodo (1962 – 1979 y 1991 – 2010), entre cual e temperatura medio a aumenta cu 0.5 grado Celsius.
Entre ambos epoca, e intensidad di e precipitacionnan extremo a aumenta un 10% riba un cuarto di e teritorio mundial. Y e sekianan ta prolonga un siman mas den e mita di e regionnan, segun e estudio, publica den e revista Nature Climate Change.
Como cu e planeta ya a gana 1 grado Celsius, respecto na e epoca anterior na e Revolucion Industrial, “awo nos ta dispone di observacionnan real cu ta permiti nos determina e impactonan concreto di calentamento,” Carl-Friedrich Schleussner, investigador di Potsdam Institute of Climate Impact Research, a bisa.
E cambio climatico, genera pa e combustion di carbon, petroleo y gas, a debuta cu e industrialisacion, pero a acelera den e ultimo 50-60 aña.
Entre e periodonan studia, e veranonan a registra temperaturanan tin biaha superior den 1 grado y winter den 2,5 grado Celsius.
E comunidad internacional a adopta na fin di 2015 na Paris, un acuerdo pa limita e calentamento bao di 2 grado, respecto na e Revolucion industral, incluso na 1,5 grado.
“Nos ta mira claramente cu un diferencia di 0.5 grado Celsius ta conta,” Erich Fischer, di e Scol Politecnico Federal di Zurick, coautor di e estudio, a splica.
Un aumento di 2 grado Celsius, respecto na 1,5 grado Celsius lo duplica por ehempel e cantidad di sekia, mientras cu si logra e dificil obhetivo di mantene den alsa bao di 1.5 grado Celsius, lo por duna un oportunidad na e bareranan di coral, curaosn di e ecosistemanan di cual 500 miyon di persona y un cuarto di bida submarino ta depende di dje.
Fuente: www.elespectador.com