Recientemente e tri-atleta Arubano, Renze Postma, a competi den e campeonato mundial bou di 23 aña organisa pa e federacion mundial di traitlon, esta ITU. E competencia a tuma luga na e ciudad di Cozumel, Mexico. E atleta Postma ta un di Aruba su atletanan elite den e deporte di traitlon y varos biaha e la representa Aruba den campeonato di taya den nos region, continente y mundial.
Den 2015, Renze a obtene un resultado satisfactorio den e Weganan Panamericano 2015 na Toronto, Canada. Entre e miho 36 atletanan di e henter continente America, e atleta Postma a obtene un di 24 luga overall, cual sin duda ta un prestacion di kita sombre. Den e campeonato mundial Under-23 World Triathlon Championships, mas cu 77 top atleta di triatlon rond mundo lo competi pa e titulo maximo na Cozumel riba e distancia Olimpico cual ta 1.5km landa den lama, despues mester recori un distancia di 40km riba bicicleta y por ultimo finalisa e evento cu un 10km core na pia. Remarcabel ta cu den e tres disciplinanan ehecuta, e parti mas fuerte di Renze ta su landamento, mientras eynan e lo mester purba na tuma e ventaha den e careda. Mester bisa cu un tiki mas cu dos aña, Renze ta entrena y dedica su mes full time na e deporte di triatlon.
Un danki sigur na Lotto, e Loteria di Aruba pa medio di Comision di Subsidio cu a subsidia e biahe di e tri-atleta Renze Postma pa e 2016 Under-23 World Triathlon Championships na Cozumel, Mexico.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio