Diadomingo ultimo a subi caya un grupo di mas cu 35 cabay pa e Parada di Cabay organisa pa Organisacion Caballista Arubano. Saliendo un poco despues di 4’or e Parada a pasa dilanti e lowrise y highrise hotels, caminda por a wak varios turista cu a sali pa asina presencia y saca potret di e participantenan bon disfrasa. Tambe tabata tin varios local cu a para banda di caminda pa mira e parada pasa. E parada tabata acompaña pa DJ Alvin cu a percura pa musica carnavalesco pa asina por disfruta di un dushi ambiente. E participantenan a usa hopi fantasia pa asina disfrasa nan mes den temanan di Mardi Gras, Zorro, Hippies, Party Dancers y Hawaiana pa menciona algun. Tambe presente tabata e Reina Infantil Evah Ras y Reina Grandi di DCG/ St. Cruz Sabina Rey cu a participa den e parada den coche.
E final tabata na Palm Beach Plaza caminda e huradonan Etline Tromp, Andrew Curiel y Lizandra Geerman a nombra e ganadonan den e diferente categorianan. Miho Disfras di Cabay y Adulto a bay pa Giandra Wever “Recordando 27 Aña”, Mihor Disfras di hoben a bay pa Alina Kock “Happy Hippie Girl”, Mihor Grupo a bay pa Rancho Monte Azul cu nan tema “Mardi Gras”, y Miho Combinacion a bay pa Earnie Panneflek y Fernando Lewis “Green Masks”. Un danki na tur participante y tambe nos Cuerpo Policial cu a haci un bon trabou den guia e Parada ariba e atardi.